«Сильные идеи для нового времени» пуорумҥа сайаапка тутуута салҕанар

«Сильные идеи для нового времени» пуорумҥа сайаапкалары муус устар 26 күнүгэр диэри туталлар. Арассыыйаны уонна Саха сирин сайыннарар идиэйэлэрдээх дьон — оскуола оҕолоро, устудьуоннар, олохтоох дьон, кэмиэрчэскэйэ суох уонна судаарыстыбыннай тэрилтэлэр ыытыахтарын сөп. Куонкурус сайаапкатын идея.росконгресс.рф саайтка туталлар.

Кыттааччылар идиэйэлэрин барыта алта хайысханан ыытыахтарын сөп:

• национальнай социальнай көҕүлээһин;
• национальнай технологическай көҕүлээһин;
• национальнай каадырыбай көҕүлээһин;
• национальнай экологическэй көҕүлээһин;
• урбаан эйгэтэ;
• сыыппара сиэрбистэрэ.

Бастыҥ бырайыактарга өйөбүллэри аныахтара уонна Арассыыйа салалтатыгар иһитиннэриэхтэрэ.

«Идиэйэ ааптардара Ыччат дьыалаларыгар уонна социальнай коммуникацияларга министиэристибэтиттэн куонкурус туһунан сиһилии ыйытыахтарын сөп. Биһиги сайаапканы биэрэргэ көмөлөһүөхпүт. Былырыын Саха сириттэн барыта уон бырайыак ситиһиилээхтик олоххо киирбитэ», — диэн министиэрстибэ исписэлииһэ Евгения Федорова бэлиэтээтэ.

Куонкурус иккис түһүмэҕэ бэс ыйыгар ыытыллыаҕа. Манна дьүүллүүр сүбэ бастыҥ үлэлэри талыаҕа. Салгыы талыллыбыт үлэлэртэн бастыҥнары куоластааһынан быһаарыахтара. Куоластааһын от ыйыттан ахсынньы ыйга диэри ааһыаҕа. Ол кэннэ бырайыактары олоххо киллэрии саҕаланыаҕа.