«Сильва» опереттаҕа сааланы толору дьон кэллэ

Саха сиригэр сэтинньи 2-12 күннэригэр ыытылла турар  опера ускуустубатын “Хотугу сир арията” бэстибээлин  чэрчитинэн  И. Кальман 2 көстүүлээх “Сильва” опереттата туруорулунна.

Сэтинньи 8 күнүгэр,  бэстибээл үһүс күнүгэр, “Сильва” оперетта сүрүн оруолларыгар оонньуур ыалдьыттары уонна, биллэн турар, бэйэбит артыыстарбытын көрөөрү хаһааҥҥытааҕар да элбэх киһи тыйаатырга кэллэ.

Ол курдук,  “На Басманной” Москватааҕы мусукаалынай тыйаатыр сүрүн артыыската уонна ырыаһыта,  ускуустуба бочуоттаах  диэйэтэлэ (Москва к.) Ирина Суханова – Сильваны, Оперетта Москватааҕы судаарыстыбаннай академическай тыйаатырын артыыһа, аан дойдутааҕы куонкурустар лауреаттара  Николай Семенов  Эдвины оонньоотулар. Опереттаҕа Мусукаалынай кэмиэдийэ Свердловскайдааҕы академическай тыйаатырын сүрүн дирижера, Арассыыйа ускуустубатын үтүөлээх диэйэтэлэ, “Кыһыл көмүс мааска” бириэмийэ лауреата Борис Нодельман режиссердаата.

Сильва Вареску – киин куорат варьетын сулуһа. Кини эдэр аристократ Эдвины таптыыр. Ол гынан баран, эдэр дьон  социальнай өттүнэн тэҥэ суохтарынан, бииргэ буолар кыахтара суох. Эбиитин Эдвин Стассины кэргэн кэпсэппит эбит.

Эдвин уонна Стасси  кэргэн кэпсэтэр күннэригэр  эмискэ кини доҕоро граф Бони Сильваны кытары тиийэн кэлэллэр уонна кэргэннии буолан кубулуналлар. Ол гынан баран,  Сильва кыайан тулуйбакка, кини Бони графка кэргэн тахсыбыт графиня аатырбатын, ол оннугар варьете ырыаһыта буоларын барыларыгар билинэн кэбиһэр.  Сильва сыанаҕа иккистээн төннөр туһунан толкуйдуу сырыттаҕына,  Эдвин төннөн кэлэр уонна төһө да тэҥэ суохтарын иһин, кэргэн тахсарга көрдөһөр….

Бонины (граф) аан дойдутааҕы куонкурустар лауреаттара Алексей Иванов, Стассины аан дойдутааҕы конкурустар лауреаттара уонна дипломаннара Мария Михайлова, Феррины СӨ норуодунай артыыһа Александр Емельянов, Леопольд кинээһи СӨ норуодунай артыыһа Юрий Баишев, Княгиня Анхильтаны РФ уонна СӨ норуодунай артыыската Айталина Адамова-Афанасьева уо.д.а. оонньоотулар.

Суорун Омоллоон аатынан Опера тыйаатырын артыыстара чаҕылхай талааннара бу опереттаҕа итэҕэтиилээхтик көһүннэ. Көрөөччүлэр Бонины оонньообут эдэр артыыс Алексей Иванов бокулуоҥҥа тахсыбытыгар дохсун ытыс тыаһынан өргө диэри сыанаттан ыыппатылар.

Опереттаҕа артыыстар оонньуулара, сотору-сотору уларыйар көстүүмнэрэ, уот-күөс, күүстээх сценография уонна, биллэн турар, оркестр тыыннаах доҕуһуола  опереттаны биир тыынынан көрөргө көмөлөстө.

СӨ култуураҕа уонна духуобунай сайдыыга миниистирэ Владислав Левочкин суруналыыстары кытары пресс-кэмпириэнсийэҕэ эппитин курдук, бэстибээлгэ чахчы чаҕылхай уонна тиэхиньикэ өттүнэн уустук испэктээкиллэр көрдөрүллэллэр. Бэстибээл “Кинээс Игорь” эпическэй операнан аһыллыбыта уонна гала-кэнсиэринэн түмүктэниэҕэ. “Хотугу сир арията” бэстибээл – муусука дьиҥнээх бырааһынньыга.

Испэктээк кэнниттэн СӨ култуураҕа уонна духуобунай сайдыыга миниистири солбуйааччы Марина Силина үрдүк ситиһиилэммит испэктээгинэн эҕэрдэлээтэ. Дирижер Борис Нодельмаҥҥа СӨ бырабыыталыстыбатын бэрэссэдээтэлин солбуйааччы Махтал суругун, солистар Ирина Сухановаҕа уонна Николай Семеновка СӨ Судаарыстыбаннай мунньаҕын (Ил Түмэн) Бочуотунай грамоталарын туттарда.