Сим-картаны атын киһиэхэ биэрэн ыстарааптаныахха сөп

Арассыыйаҕа сим-картаны үһүс киһиэхэ биэрии иһин ыстараап туһунан сокуон балаҕан ыйын 1 күнүттэн олоххо киирэр. Бу туһунан ТАСС суруйар.

Судаарыстыбыннай Дуума Информационнай бэлиитикэҕэ, информационнай технологияларга уонна сибээскэ кэмитиэтин чилиэнэ Антон Немкин иһитиннэрбитинэн, сокуон олох-дьаһах түгэннэрин хааччахтаабат.

Холобур, төрөппүттэр ууруккуларын курдук оҕолоругар, оттон оҕолор саастаах төрөппүттэригэр сим-карта атыылаһар кыахтаахтар. Ол эрээри, бэйэҕэ диэн атыылаһан баран доҕотторгутугар, бииргэ үлэлиир дьоҥҥутугар эбэтэр ыкса ыалгытыгар биэрии – сокуону кэһии. Бу иһин ыстараап төлүөххэ сөп диэн эппит.

Саҥа уларыйыыга олоҕурдахха, сим-картаны үһүс киһиэхэ биэрии иһин ыстараап суумата биирдиилээн дьоҥҥо 50 тыһ. солк. диэри, юридическай сирэйдэргэ – 200 тыһ. солк. диэри. Бу туһунан ТАСС  суруйар.