«Симэммит Мааныкай» куонкуруска кыттыҥ

Батсаабынан Чурапчы улууһун Төлөй нэһилиэгин араастаан симэммит ынахтарын хаартыскаларын куонкуруһун үгүс киһи өйдүүрэ чахчы. 

Бу «Симэммит Мааныкай» диэн ынах сүөһү хаартысканан куонкуруһун төлөйдөр быйыл эмиэ ыытаары тэринэн эрэллэр. Бу туһунан сиһилии А.С. Бродников аатынан Төлөйдөөҕү «Аартык» норуот айымньытын дьиэтин дириэктэрэ Максим Смирников  кэпсиир:
— Быйыл норуокка биһирэммит куонкуруһу үһүс төгүлүн  ыытабыт. Бастакыбыт нэһилиэк иһинэн буолбута. Онтон дьон биһирээн, тэрээһини өрөспүүбүлүкэтээҕи таһымнаан ыыппыппыт. Нэһилиэкпитигэр сыл аайы Тыа хаьаайыстыбатын үлэһиттэрин күнүн бэлиэтиибит. Ол онно бу күөн-күрэһи анаан тэрийэн, үгэскэ кубулуттубут.  Хаартысканан куонкуруһу сэтинньи 4 күнүттэн сэтинньи 18 күнүгэр диэри ыытабыт.

«Симэммит Мааныкай» хаартысканан куонкурус куйаар ситимин нөҥүө ыытыллар. Бу тыа хаһаайыстыбатын үлэһитин өрө тутар соруктаах аһаҕас өрөспүүбүлүкэтээҕи хаартысканан куонкуруска ханнык баҕарар нэһилиэктэн ким баҕарар кыттыан сөп.
Сүөһү сааһыгар да, тыһытыгар да, оҕуһугар да ирдэбил суох. Куонкурус сүрүн соруга — хас биирдии хотоҥҥо кыстыгы этэҥҥэ туораары бэлэмнэнэр Мааныкай сүөһүнү  киэргэтэн, хаартыскаҕа түһэрэн ыытыы.
Кыттааччы +79627311182 нүөмэргэ (Евдокия Ефимовна А.) Сбербанк эбэтэр АЭБ нөҥүө 200 солкуобай усунуос төлүүр уонна төлөөбүтүн туһунан квитанциятын  эмиэ бу нүөмэргэ ыытар. Сайаапканы батсаап бу ыйыллыбыт нүөмэригэр ылабыт. Онно кыттааччы аата (сүөһү хаһаайына), хаартыскаҕа түһэриллибит сүөһү аата, улууһа, нэһилиэгэ ыйыллар. Бу сайаапкатынан кыттааччы хаһаайын кини ыыппыт хаартыската teleydnt.ru саайтка тахсарыгар сөбүлэҥин биэрэр. Сүрүн ирдэбил: биир сүөһүнү үс өттүттэн түһэриэхтээххит. Үстэн элбэх хаартысканы ыыттаххытына, тэрийээччи бэйэтин көрүүтүгэр үс хаартысканы талан таһаарар. Дьүүллүүр сүбэ хайаан да биир эрэ киэргэммит сүөһү хаартыскатын ылар.

Кыайыылааҕы Төлөйдөөҕү норуот айымньытын дьиэтин үлэһиттэрэ, Төлөй нэһилиэгин дьаһалтатын тыа хаһаайыстыбатын  исписэлииһэ кыттыылаах дьүүллүүр сүбэ талыаҕа.

«Кылаан кыайыылаах» номинация бирииһэ — 40 л. үүт туттарар бөтүөн.  Атын улуус кыттааччыта кыайыылааҕынан  таҕыстаҕына, Дьокуускай куоракка киллэрэн тустаах аадырыска хаалларабыт, онтон кэлэн ылыахтара.

Маны таһынан «Көрөөччү биһирэбилэ» анал бириис кыайыылааҕын teleydnt.ru саайтка «биһирэбил» (лайк) ахсаанынан быһаарыахпыт. «Биһирэбили» биир киһи күҥҥэ биирдэ туруорар.  Сайтка «лайк» ааҕыыта сэтинньи 18 күнүгэр  24:00 чааска түмүктэнэр.
Бары кыттааччыларга кыттыбыттарын туоһулуур  анал сэртипикээти   электроннай почтанан эбэтэр батсаап нүөмэрдэригэр ыытабыт.
Дьэ, онон, күндү «Саха сирэ» саайт ааҕааччылара, бу күнтэн ыла  «Мааныкайдаргытын» симээн, куонкуруска кыттарга сананан барар буоллаххыт. Биһиги саайпыт бу куонкурус хаамыытын хайаан да сырдатан,  Төлөйдөөҕү «Аартык» норуот айымньытын дьиэтин үлэһиттэрин өйүөҕэ. Кытаатыҥ, бүгүҥҥүттэн хотоҥҥутугар киирэн, ханнык «Мааныкайы» куонкуруска кытыннараргытын быһаарыҥ.