Сир баайын хостуур тэрилтэ ууну киртитэн ыстарааптанна

Нерюнгри оройуонун борокуратууратын ирдэбилинэн бырамыысалынай тэрилтэ ууну киртиппитин иһин 1 мөл. солкуобай кэриҥэ ыстараабы төлөөтө.

Бэрэбиэркэ быһаарбытынан, биир коммерческай тэрилтэ сир аннынааҕы баайы туһаныыга бырааптаах көҥүллээҕинэн (лицензия) туһанан Нерюнгри оройуонугар чинчийиинэн уонна туһалаах баайы хостооһунунан дьарыктанар эбит.

Ол гынан баран, тэрилтэ тулалыыр эйгэни харыстааһын сокуонун ирдэбиллэрин кэһэн туран кирдээх, туһаныллыбыт уутун Александровскай (Тимптон өрүс салаата) үрэҕэр бырахтарбыт. Ол түмүгэр үрэх уутун ыйааһыннаах эттиктэрэ нуорматтан 87 төгүл үрдээн, киртийбитэ бэлиэтэммит.

Инньэ гынан айылҕаҕа 1 мөл. солк. суумалаах улахан хоромньу оҥоһуллубут. Борокуратуура уурааҕынан тэрилтэ РФ КоАП 8.13 ыст. 4 ч. (уу эбийиэгин харыстыыр ирдэбиллэри кэһии) административнай эппитэтинэскэ тардыллан, 75 тыһыынча солкуобай суумаҕа ыстарааптанан төлөөтө. Нерюнгри куорат борокуратууратын ирдэбилинэн, суут уонна уопсастыба өйөбүлүнэн, үрэх уутугар оҥоһуллубут хоромньу толуйулунна диэн иһитиннэрэр СӨ Борокуратууратын пресс-сулууспата.