Сир баайын туһанааччылар Өймөкөөн улууһугар 70 мөлүйүөнтэн тахса суумалаах көмөнү оҥордулар

Өймөкөөн улууһугар үлэлиир сир баайын туһанааччылар Өймөкөөн улууһун олохтоохторугар 70 мөлүйүөнтэн тахса суумалаах харчыны ыыттылар. Ол туһунан Саха сирин бырабыыталыстыбатын бэрэссэдээтэлин бастакы солобуйааччы Дьулустаан Борисов Өймөкөөн улууһугар сир баайын хостооччуларга ыыппыт мунньаҕар иһитиннэрдилэр.

Дьулустаан Борисов эппитинэн, улууска үлэлиир 32 хампаанньаттан 22 хампаанньа хайыы үйэ көмөлөстө.

«Биһиги көмөлөспүт хампаанньаларга махтанабыт уонна атыттар эмиэ бу үлэҕэ кыттыһыахтарыгар эрэнэбит”, — диэн бырабыыталыстыба бэрэссэдээтэлин бастакы солбуйааччы баайдаах сири туһанар хампаанньалар атын көмөнү эмиэ оҥороллорун санатта.

Ол курдук, «Поиск Золото» Өймөкөөн уонна Орто Балаҕан сэлиэнньэлэрин аннынан Индигиир өрүскэ дириҥэтэр үлэлэри ыытар. Маннык дьаһал  халаан хатыланар кутталын аҕыйатыаҕа  уонна инникитин нэһилиэнньэлээх пууннар ууга барыыларыттан харыстыаҕа.

Өрөспүүбүлүкэ салалтата уонна баайдаах сири туһанааччылар ууттан  эмсэҕэлээбиттэргэ кылгас кэм иһигэр  тустаах көмөнү оҥорор уонна социальнай, тырааныспар инфраструктуратын чөлүгэр түһэриини хааччыйар туһугар күүстэрин холбууллар.

СӨ Ил Дарханын уонна бырабыыталыстыбатын пресс-сулууспата