Сир кыбартыыра курдук эргэрбэт…

Сайыҥҥы былдьаһыктаах күннэр тураллар. Ким эрэ оттуур, кыстыкка бэлэмнэнэр. Сорох киһи чэпчэки сыанаҕа  учаастак атыылаһан, дьиэ-уот туттарга тиэтэйэр.  

Бүгүн учаастак туһунан кылгастык кэпсиэхпит. Туораттан кэтээн көрдөххө, быйылгы 2025 сылга учаастак атыылаһыан баҕалаах киһи элбээбит курдук. Кыһын хам-түм биллэриилэр тахсар буоллахтарына, билигин атыылыыбыт-атыылаһабыт диэни үгүстүк көрүөххэ сөп. Манна, бастатан туран, биири өйдүөххэ наада. Ол курдук, учаастак туохха ананара, онно тугу тутуохха сөбө чопчу буолуохтаах. Оччоҕо эрэ бу учаастагы ылбыт киһи сыалын ситиһиэҕэ. Атыылыыр да киһи атыылаабыт эрэ киһи диэн атыылыы-батара сатыыр кэмэ буолбатах. Үп-харчы син-биир кырыымчык диэн үп эйгэтин үлэһиттэрэ, билгэһиттэр эҥин куруук этэллэр, сүбэлииллэр.

Атын сиргэ учаастак ылыан баҕалаахтарга Крымҥа ылыаххытын сөп диэн эспиэрдэр сүбэлииллэр. Билигин итиннэ чэпчэки сыанаҕа, инники өттүгэр кэскиллээх олус үчүгэй сирдэр баалларын туһунан этэллэр.

Инвестиция

Учаастагы инвестиция курдук көрүөххэ диэни син билэр, удумаҕалатар курдук этим эрээри, учаастагы инвестиция курдук тоҕо көрүөххэ наадатын сиһилии билбэт эбиппин.

Ыраах сиринэн тэлэһийэ сылдьар риэлтор Камина Заровняева бу боппуруоска маннык сүбэлээтэ:

— Кыра суумалааҕы да ылыахха сөп;

— Докумуонун толорсуута чэпчэки;

— Кыбартыыра курдук эргэрбэт:

— Үчүгэй локациялаах сир сыаната үрдүү турар;

— Сыанатын ыаратан атыылаан, үп-харчы оҥоруохха сөп;

— Сир (учаастак) хаһан да сыаната түспэт.

Дьэ, кыбартыыра курдук эргэрбэт диэни атыылаһааччылар долоҕойдоругар хатыахтарын наада.

Покровскайдыыр аартыгы ордороллор

Тоҕо? Ити диэки Өлүөнэ муостата тутуллар уонна суола үчүгэй буолан, дьон бу эргин атыылаһа сатыыр буолбут. Билигин үгүс киһи бас билэр массыыналаах буолан, үчүгэй суоллаах-иистээх сири көрөрө чахчы. Ону тэҥэ бу сир-уот таһынан гаас ааһар, гаастаах буоллаҕына эмиэ дьон интэриэһин тардар эбит. Кырдьык, билигин дьон оттор маһынан дьарыктаныахтарын баҕарбаттар. Кэллибит, холбоннубут, гаас сылытар, аһатар диэн өйдөбүлү тутуһан эрдэхтэрэ. Онон учаастак сыанатыгар ити муоста уонна гаас улахан сабыдыаллаахтара көстөр. Холобура, “Тускулга” ортотунан ыллахха, сыана — 2,5 мөл. солк. Хатас диэки гаастаах буоллаҕына эмиэ — 2500000 солк. Пригороднайга Уһук Илиҥҥи ипэтиэкэнэн (үгүстэр ДВИ дииллэр) бэлэм дьиэни атыылаһыахха сөп. Суол биир өттө — куорат уокуругар киирсэр. Марха диэки эмиэ куоракка хапсар. Онон гаастаах учаастактар 2–2,5 мөл. солк. сыаналаахтар.

— Тулагы-Киллэм диэки сыана чэпчиир. Ыраах диэннэр ити өттүн соччо көрбөт буоллулар, — диир биир дьиэ-уот, сир атыытынан дьарыктанар кыыс.

Аны туран, сороҕор, учаастак атыыланарыгар олоччу туга да суох буолуохтаах диэн этэ даҕаны, быраабыла уларыйа турар курдук. Онон атыылааччылар уонна атыылаһааччылар куруук иһитиннэриини ааҕа-билэ сылдьыахтаахтар.

Өссө биир дьикти сонуну иһиттим. Ол курдук, ыраах эҥин соҕус атыылаһан баран, төттөрү атыылааччылар элбиэх чинчилэммиттэр. Кырдьык, туох эрэ үчүгэйгэ тардыһар киһи ымсыырбыт санаатыгар ситэ-хото билбэккэ, учаастагы атыылаһан кэбиһэрэ баар суол буоллаҕа.

Куорат салалтата уонна борокуратуура сэрэтэллэр

Дьокуускай куорат мээрэ Евгений Григорьев кэнники кэмҥэ сир учаастагар сыһыаннаах боппуруостарга өрүү санаатын этэр. Сорох түгэннэргэ дьону сыыһа хардыыттан сэрэтэр даҕаны. Сир учаастактарын атыылыыр биллэриилэргэ “тыа хаһаайыстыбатыгар аналлаах” диэн биллэриилэр олус элбэхтэр. Холобура, Покровскайдыыр аартык 17 км 465 тыһ. солк. маннык аналлаах учаастагы атыылыыр баҕалаахтар.

Дьокуускай куорат дьаһалтатын “Сиргэ сыһыаннаһыыларга ааҕыныстыбата” иһитиннэрбитинэн, тыа хаһаайыстыбатыгар туһаныыга, тыа хаһаайыстыбатын оҥорон таһаарыытын эбийиэктэригэр анаммыт сир учаастактарыгар олорор дьиэлэри туттуу бобуллар. Бу учаастактар тыа хаһаайыстыбатын үлэтигэр эрэ аналлаахтар. Маны болҕомтоҕо ылыахтаахпыт. Оттон Борокуратуура сир учаастактарыгар сыһыаннаах түөкүннээһин тустарынан эмиэ биллэрэрин бэйэҕит да ааҕа олороҕут.

Кэпсиири сатаатаххына

Сирдэрин учаастагын хайдах эмэ ботуччу соҕус сыанаҕа батаран, араас наадаларыгар (ипэтиэкэни сабыы, кыбартыыра атыылаһыытыгар уо. д.а.) туһаныахтарын баҕалаахтар угуйук өттүн кыайар буолбуттар. “Сарсыардааҥҥы туман күөл үрдүнэн үҥкүүлүүр”, “Олбуору ыалым туппат, хатыҥнар туталлар” эҥин диэбит курдук биллэриилэри аахтахха, киһи бэйэтэ да билбэтинэн, учаастак ылыан баҕарар санаата күүһүрэр.

Оттон “гаас дэписсиитэ суох” диэн ааттаммыт Хатыҥ Үрэххэ 2‑с даамбаҕа учаастагы 3100 тыһ. солк. атыылыа этибит диэн биллэрэллэр. Дьон сайыҥҥы уулаах, уоттаах диэни бастаан көрөр, онтон сирдэтэн, ханна, төһө табыгастаах сиргэ турарын. Үгүстэр гаас 2027 сылга киирээри турар диэн мончууктаан, килийиэннэри угуйаллар.

Сир учаастагын атыылаһаргытыгар болҕомтолоох буолуҥ.

Камина Заровняева, риэлтор:

— Билигин үгүс элбэх араас учаастак атыыланар. Ол учаастактар бары тус-туспа аналлаахтар. Атыылаһаат даҕаны тута дьиэ туттабыт диир дьоҥҥо “ИЖС” барсар. Оттон ылан баран ыксаабакка, кэнники наадата-туһата кэлиэ диир дьон “тыа хаһаайыстыбатыгар аналлааҕы” көрүөхтэрин сөп. Мин санаабар, билигин Покровскайдыыр аартык (Покровский тракт) саамай кэскиллээхтэрэ курдук. Кылаабынайа, ”кыһыл лииньийэ” ааспат, кураанах сир буолуохтаах. Килийиэннэргэ атыылаһыаххыт иннинэ кадастр.ру саайтка киирэн бэрэбиэркэлээҥ диэн сүбэлиибин. Ону тэҥэ булгуччу атыыһыт докумуоннарын эмиэ.