Сирэйэ ириҥэрбит ыты быыһаатылар

Бүлүүтээҕи бэтэринээринэй пууҥҥа ыт сирэйэ ириҥэрбитин эмтээтилэр. Боотур диэн ааттаах, 13 саастаах ыты пууҥҥа  хаһаайына аҕалбыт. Ыт сирэйин аҥаара иһэн тахсыбыт, ириҥэлээх баас үөскээбит эбит.

Бэтэринээрдэр көрөн-истэн баран, этигэр дириҥник өтөн киирбит ириҥэлээх баас диэн быһаардылар. Бу ириҥэлээх иһии улаханнык ыарытыннарар, онон Боотур сирэйин таарыйтарбат, ыарыытыттан ыйылыыр буолбут этэ. Бэтэринээрдэр ыты утутан, бааһы хайытан, ириҥэтин ыраастаан, сууйан-сотон баран, антибиотиктары анаатылар. Билигин ыт туругун кэтээн көрөллөр.

Бу маннык ириҥэлээх баас «абцесс» диэн ааттанар. Бэтэринээрдэр этэллэринэн, ыттар үксүн бэйэ-бэйэлэрин кытта охсуһа сылдьан, ытырсаллар, бааһыраллар. Кыыллар айахтарыгар бактыарыйалаах буоланнар, бааска бактыарыйа, инфекция киирэн, ириҥэрэн, иһэн барар.

Оттон тириитэ оһон хаалар, онон бастаан баас оспут курдук буолар. Ол эрээри, бактыарыйалар элбээн, ириҥэ эбиллэн иһэр. Организм бэйэтэ кыайан ыраастаммат, ыарыыны кыайбат, онтон абсцесс үөскүүр, сыыйа хаан сүһүрэр. Маннык түгэҥҥэ бэтэринээр, быраас эрэ көмөлөһөр кыахтаах.