Ситэриилээх былаас отчуота Бүлүү улууһугар саҕаланна

Өрөспүүбүлүкэ ситэриилээх былааһын отчуота Бүлүү улууһугар Тааһаҕар нэһилиэгиттэн саҕаланна.

Нэһилиэккэ 500-н тахса киһи олорор. Кэнники саҥа оскуола, кулууп, биэлсэр-акушер пууна, ДПО, хочуолунай тутуллубуттар. Нэһилиэккэ сүрүннээн тыа хаһаайыстыбатынан дьарыктаналлар, уопсайа 630 сүөһүлээхтэр, 4 бааһынай хаһаайыстыбалаахтар.

Бүлүү бөлөх улуустара гаас киирэрин туруорсар буоллахтарына, манна ыал бары күөх төлөнүнэн хааччыллан олорор. Онон саҥа хочуолунай социальнай эбийиэктэри эрэ сылааһынан хааччыйар.
Тааһаҕарга суотабай сибээс эмиэ үчүгэй. Бу нэһилиэк биир уратытынан, нэһилиэк бас-көс дьоно, салайааччылара өр сыл эҥкилэ суох үлэлииллэрэ буолар. Холобур, урукку баһылыктара Афанасий Петрович Поскачин 40-н тахса сыл нэһилиэги салайан баран, билигин бочуоттаах сынньалаҥҥа олорор. Оскуола дириэктэринэн Семен Иванович Васильев 40 сыл, уһуйаан сэбиэдиссэйинэн Наталия Алексеевна Семенова 39, кулууп дириэктэринэн Клавдия Васильевна Петрова 40, биэлсэр-акушер пуунугар Зоя Васильевна Шамаева 40-н тахса сыл салайан кэлбиттэр.
Санатан эттэххэ, СӨ Бырабыыталыстыбатын отчуота Бүлүү улууһугар түөрт бөлөххө арахсан үлэлиэ. Бастакы бөлөх — Тааһаҕар, Бөтүҥ, I Күүлэт, Үгүлээт нэһилиэктэригэр, Кыһыл Сыырга; иккис бөлөх — Илбэҥэҕэ, Лөкөчөөҥҥө, II-с Күүлэккэ, Тылгыныга, Кыһыл Сыырга; үһүс бөлөх Дьөккөҥҥө, Хампаҕа, Бороҕоҥҥо, Тыымпыга, Сыдыбылга, Балаҕаччыга; төрдүс бөлөх — Өкүндэҕэ, Чинэкэҕэ, Сатаҕайга, Халбаакыга, Кировка ситэриилээх былаас отчуотун ыытыа.
Бырабыыталыстыба ааспыт сыллаах үлэтин улууска отчуотун Бүлүү куоратыгар түмүктүө.