Ситэриилээх былаас отчуоттуур бөлөҕө Бүлүү улууһун Үгүлээт нэһилиэгэр үлэлээтэ
![](https://sakha-sire.ru/wp-content/uploads/2023/02/3b472efa-0f4c-499a-aa44-b6eff6c6b2f6-1060x596.jpg)
Саха Өрөспүүбүлүкэтин ситэриилээх былааһын отчуоттуур бөлөҕө Бүлүү улууһун Үгүлээт нэһилиэгэр үлэлээтэ. Үгүлээккэ 600-кэ киһи олорор. Улуус кииниттэн 200 км хоту, өрүс уҥуор сытар саамай кытыы нэһилиэк, суола-ииһэ мөлтөһүөр.
Үгүлээт ааспыт 2022 с. күһүнүгэр төрүттэммитэ 388 сылын бэлиэтээбит, онон баай устуоруйалаах, кырдьаҕас нэһилиэктэртэн биирдэстэрэ. Үгүлээт баһылыга Октябрь Лукин ааспыт сыллаахха нэһилиэк былыр төрүттэммитин, нууччалар кэлиилэрин туоһулуур архыып докумуонун туппуттарын кэпсээтэ.
Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Михаил Никифоров ситэриилээх былаас ааспыт сыллаах отчуотун сахалыы лоп-бааччы саҥаран, судургутук быһааран кэпсиирин нэһилиэнньэ биһирээтэ.
![](https://sakha-sire.ru/wp-content/uploads/2023/02/a7fc0883-57e4-4881-99ff-cf90732c483c.jpg)
![](https://sakha-sire.ru/wp-content/uploads/2023/02/3e4b231a-231c-4ffb-b536-c60cea4147d2.jpg)
![](https://sakha-sire.ru/wp-content/uploads/2023/02/0aa46291-6a0d-4e24-9e63-e1fb939c128a.jpg)
Нэһилиэк олохтооҕо Александра Индеева кэнники кэмҥэ уотунан туһаныы улахан кыһалҕа буолбутун, ыстаансыйалар кыамталара кыратын туһунан эттэ. Кини сайын аайы былааннаах өрөмүөн үлэтэ диэн, уоту арааралларыттан лаардар, холодильниктар ирэннэр, ас-үөл буортуйарын холобурдаата, итиниэхэ газотурбиннай ыстаансыйа солбук быһыытынан тоҕо тутуллубатын ыйытта. Онуоха Бырабыыталыстыба бэрэссэдээтэлин солбуйааччы Михаил Никифоров: «Сөптөөх боппуруос, боротокуолга киллэриэхпит. Үрдүк күүрүүлээх лииньийэни өрөмүөннүүллэригэр Бүлүү бөлөх улуустарын уотун барытын араараллар. Оттон солбук быһыытынан, газотурбиннай ыстаансыйаны тутууга улуус дьаһалтата үлэлэһиэн сөп», — диэн быһаарда.
Оскуола дириэктэрэ Любовь Ксенофонтова физика, английскай, нуучча тылларын, физкултуура учууталлара тиийбэттэрин эттэ. Онно тус сыаллаах миэстэнэн үөрэммит исписэлиистэри чопчу дуогабардаах сирдэригэр үлэлэтэ ыытар курдук мэхэньиисим оҥоһулуннаҕына маннык кыһалҕа быһаарыллыан эттэ. Кырдьык, үгүстэр үөрэҕи бүтэрэллэригэр эрдэ дуогабар түһэрсэн баран, дьупулуом ыллахтарына, аккаастанан, куорат диэки талаһаллара баар көстүү.
Нэһилиэк дьокутаата Байрон Иванов урукку сылларга бэйэбит үчүгэй хаачыстыбалаах оппутун атыылыыр буоллахпытына, ааспыт сылтан, улахан ардахтартан кыһарыйтарын, оппутун атыылаһар буоллубут, аны туран ходуһа дулҕанан үүнэн кыһалҕа үөскээтэ диэн эттэ. Ол атын улуустан атыылаһар отторо сыаната ыараханын ааһан, хаачыстыбата мөлтөх буолар эбит. Оттон ходуһаны оҥоруу үлэтэ кэнники барбат буолбутун бары билэбит. Онно, быйыл өрөспүүбүлүкэ үрдүнэн 100 мөл. солкуобай үп көрүллүбүт, билиҥҥитэ тустаах докумуон оҥоһулла сылдьар диэн быһаардылар.
Сибээс балысханнык сайдар, оскуола, оҕо уһуйаана тутуллар, суол-иис оҥоһуута киэҥник барар кэмигэр кытыы сытар нэһилиэктэр эмиэ туруорсаллар.
Тыа сиригэр биир кыһалҕалаах боппуруоһунан өртөөһүн буолар. Хас сылдьыбыт нэһилиэкпит аайы ону ыйыталастылар. «Сахатранснефтегаз» тэрилтэ силиэсэрэ Иван Афанасьев ол туһунан ыйытта.
Үгүлээт ыраах сытарынан, суола-ииһэ уустугунан, сайын сөмөлүөт көтөр, онуоха сыаната олус ыарахан эбит. Лена Мандарова «Сөмөлүөтүнэн көтүүгэ субсидия оҥоһуллуо дуо?» диэн ыйытта.
Кытыы нэһилиэктэр мэлдьи буоларын курдук, элбэх боппуруостаах буолаллар. Үгүлээттэр эмиэ киэҥ хабааннаах боппуруостары туруорустулар.
Түмүккэ, Бырабыыталыстыба отчуотун бөлөҕүн салайааччы Михаил Никифоров тыа хаһаайыстыбата биэрэр үбүн сөпкө туттарга, оҕуруот аһын дэлэйдик үүннэрэн хааччынарга итиэннэ быйылгы быыбарга сахалар түмсүөххэ, санаабытын холбуохха диэн ыҥырда.
Сообщить об опечатке
Текст, который будет отправлен нашим редакторам: