«Ситим» литература сойууһа байыаннай дьайыы кыттыылаахтарыгар көмөлөһөр

2024 сылга тэриллибит «Ситим» — Саха сирин көҥүл суруйааччыларын Сойууһа ааспыт ыйга бастакы тэрээһинин,  «Ырыа буолбут хоһооннор» диэн кэнсиэри Ф.И.Авдеева аатынан Оҕо айымньытын дьиэтигэр тэрийдэ.

Бу кэнсиэр байыаннай дьайыыга дойдубут көҥүлүн көмүскүү сылдьар саха хорсун буойуттарыгар бэйэ кыаҕынан көмө оҥорор сыаллаах-соруктаах тэриллибитэ.
Кэнсиэри «Ситим» сойуус хоһоонньуттара Л.И.Бандерова-Слепцова-Айыллаана, С.А.Семенов-Сэгэй, А.П.Григорьева, С.Е.Кожуров-Ыстапаан Таастаах, П.П.Неустроев-Айаанньа Уус састааптаах уус-уран сэбиэт Саха сирин араас муннуктарыгар олорор айар дьоҕурдаах дьону түмэн тэрийдэ. Өрөспүүбүлүкэ биллэр ырыаһыттара, мелодистар Люция Бандерова-Айыллаана, Николай Протопопов, Елена Нам-Чы, Алексей Потапов, Сунтаар күөрэгэйэ Людмила Спиридонова, мелодист-хоһоонньут Сэргэй Сэмэнэп-Сэгэй, мелодист-баянист  Татьяна Бандерова-Ырыа Татыйаас, ырыаһыт Марианна Федотова-Намыына уо.д.а. кэрэ куоластарынан өрө көтөҕүллүүлээхтик ыллаатылар.

“Махтал” (сал. Екатерина Новикова-Дьулуура), “Кэрэ эйгэ” (сал. Мария Соловьёва), “Дьоһун саас” (сал. Мария Слепцова), “Ситим” (сал. Кэрэмэс Саргы) үҥкүү ансаамбыллара тэтимнээх сэргэх үҥкүүлэринэн кэлбит дьон сүргэлэрин көтөхтүлэр. Көрөөччүлэр бэртээхэй хоһооннорго талааннаах мелодистар суруйбут истиҥ ырыаларын иэйиилээхтик толорбуттарын хайҕаан, күргүөмнээх ытыс тыаһынан махталларын биллэрдилэр. Уопуттаах хореографтар элбэх киһилээх сонун үҥкүүлэрэ кэнсиэри олус киэргэттилэр.
Бу тэрээһини «Ситим» сойууһу көҕүлээн тэрийбит, дьон-сэргэ сөбүлээн ааҕар «Дьылҕа оҥоһуга», «Саха эр дьоно», «Саллаат аҕата», «Шаддат», о.д.а. кинигэлэр ааптардара, урбаанньыт, уус Иван Парфеньевич Александров толкуйдаабыта. Кини байыаннай дьайыы буола турар сиригэр тиийэн, икки ый охранаҕа үлэлээн, буола турар быһыыны-майгыны, саллааттар туох  санаалаахтарын иһиттэн билэн кэлбит киһи, онон айымньылара үксэ кинилэр кэпсээннэригэр олоҕурар.

Өрөспүүбүлүкэтээҕи «Илии сылааһа» сыах салайааччыта И.Е.Саввина иһитиннэрбитинэн, “Ситимнэр” үс чаас устата кэнсиэрдээн уонна биирдиилээн дьонтон киирбит 106 000 солкуобай харчыларынан байыаннай дьайыыга барааччыларга таҥас тигэр хас да рулон чараас, халыҥ матырыйааллары бу күннэргэ ылбыттар. Ону видеонан көрдөрөн кэпсээтэ.
Бу иннинэ «Ситим» хоһоонньуттара «Илии сылааһа» тикпит таҥастаах үрүксээктэригэр алгыс тыллаах хоһооннорун суруйан ыыппыттара.

Анна ГРИГОРЬЕВА, Тааттаттан төрүттээх,  «Ситим» сойуус чилиэнэ