Смарт-бибилэтиэкэҕэ — эдэр саас ырыаларын киэһэтэ

Бүгүн, сэтинньи 20 күнүгэр, Смарт-бибилэтиэкэҕэ Дьокуускай куорат төрүт олохтооҕо, биллиилээх учуонай Пантелеймон Егоров “Биһиги эдэр сааспыт ырыаларыныын көрсүһүү” диэн  айар биэчэрэ бэрт сэргэхтик ааста.

Бу күн мустубут дьон олохторун сорҕотунан буолбут, эдэр эрдэхтэринэ дууһаларын сылааһынан угуттаабыт истиҥ иэйиилээх  ырыалары Пантелеймон Романович гитаранан уонна байаанынан доҕуһуолунан толоруутун иһиттилэр уонна тэҥҥэ ылластылар.

Аан бастаан Пантелеймон Романович төрөппүт ийэтин туһунан бастакы презентациятын экраҥҥа билиһиннэрдэ. Пантелеймон Егоров  1953 сыллаахха элбэх оҕолоох дьиэ кэргэҥҥэ катаракта ыарыылаах төрөөбүтэ. 1969 сыллаахха көрбөттөр уонна мөлтөхтүк көрөр оҕолор өрөспүүбүлүкэтээҕи оскуолаларын бүтэриэҕиттэн ыла олоҕун баай устуоруйата саҕаламмыта, үөрэххэ, үлэҕэ  дьулуура үгүс ситиһиилэргэ, үрдүк ааттарга сирдээбитэ. Бүгүҥҥү киэһэ “буруйдааҕа” тус  олоҕор ураты оруолу ылбыт бастакы учуутала Георгий Алексеевич Слепцов туһунан ахтан-санаан ааста.

Пантелеймон Егоров  айар киэһэтин “Катюша” ырыанан саҕалаата. Ол кэнниттэн саала иһэ “Ньургуһунна бэлэхтээ”, “Родина”, “Махтал ырыата”, “Уральская рябинушка”, “Кэрэ кыыска”, “Милая мама”, “Тойбохой”, уо.д.а. ырыалары тэҥҥэ ыллаһа олордо. Ырыалар тыллара экраҥҥа көстө турдулар. Тэрээһиҥҥэ Светлана Степанова салайааччылаах «Сыдьаайа» уонна Вера Шараборина салайар «Кыыллаах Арыы кыргыттара» ансаамбыллар кыттаннар, чахчыта да, истиҥ-иһирэх ырыа киэһэтин ситэрэн-хоторон биэрдилэр.

Айар киэһэ иккис чааһыгар байыаннай кэм ырыалара ньиргийдилэр. Пантелеймон Егоров  байааҥҥа доҕуһуолунан “Орленок”, “В землянке”, “Прощание”, “Там вдали, за рекой” ырыалары толордулар.

Онтон толорооччу илиитигэр гитаратын ылаат: “Доҕоттор, муусука – биһиги тэҥҥэ толорор ырыаларбыт эрэ буолбатахтар. Муусука – дууһабытыгар баар тыллар, эһигини кытары үллэстиэхпин баҕарар үтүөкэннээх тылларым. Онон, эһиэхэ аҕыйах хоһоону ааҕыахпын баҕарабын”, — диэтэ уонна  нууччалыы, сахалыы уонна ниэмэс тылларынан хоһооннору аахта.

Бүгүҥҥү киэһэни ыытааччы бэлиэтээн эппитин курдук, бүгүн чахчы да, биһиги олохпут, биһиги эдэр сааспыт устун дьиҥнээх айан буолла. Дьокуускай куорат кииннэммит бибилэтиэкэлэрин ситимин дириэктэрэ Нюргуяна Петровна Решетникова  дьоро киэһэ кыттыылаахтарыгар Махтал суруктары туттарда.

Түмүккэ “Подмосковные вечера”, “Я люблю тебя жизнь” ырыалар толоруллубуттара мээнэҕэ буолбата. Тоҕо диэтэххэ, “Биһиги эдэр сааспыт ырыаларыныын көрсүһүү” айар биэчэр хас биирдии киһи сүрэҕэр үйэлээх өйдөбүнньүгү  уонна сырдык ахтыылары хаалларда.

Пантелеймон Романович кинини истэ  айар киэһэтигэр кэлбиттэргэ уонна кыттыбыт ансаамбыллар  ырыаһыттарыгар ис сүрэҕиттэн махтанна. Оттон саала  дьоно үйэлээх сыаннастар, олоххо таптал, айылҕа кэрэ көстүүлэрин уо.д.а. туһунан истиҥ-иһирэх ырыалары истэн, эдэр саастарыгар төннөн ылбыттарыгар, олоххо тапталлара өссө күүһүрбүтүгэр Пантелеймон Егоровка уонна бүгүҥҥү киэһэни тэрийбит Смарт-бибилэтиэкэ үлэһиттэригэр махтаннылар.

БЫҺААРЫЫ:

Пантелеймон Романович Егоров — уопсастыбаннай диэйэтэл, үөрэххэ ураты сыһыаҥҥа наадыйар  устудьуоннар, аспираннар уонна исписэлиистэр өрөспүүбүлүкэтээҕи ассоциацияларын бырабылыанньатын бэрэссэдээтэлэ, СӨ бырабыыталыстыбатын иһинэн инбэлииттэр дьыалаларыгар сэбиэт чилиэнэ, СӨ инклюзивнай үөрэхтээһиҥҥэ сүрүннүүр сэбиэт бэрэссэдээтэлин солбуйааччы, “Толбон” үөрэтэр-производственнай ааҕар-суоттуур киин дириэктэрэ, ХИФУ инклюзивнай үөрэхтээһини сайыннарыыга Хотугулуу-Илиҥҥи научнай-инновационнай киин дириэктэрэ, педагогика билимин хандьытаата, биллиилээх учуонай.