«Смотри, это Россия!» куонкурус үбүлүөйдээх сезона саҕаланна

Саха сирэ көҕүлээһининэн «Смотри, это Россия!» Бүтүн Арассыыйатааҕы видео-аккырыыккаларынан атастаһыы куонкурусун V үбүлүөйдээх сезона саҕаланна. 

Куонкуруска сайаапкалары ылыы алтынньы 16 күнүттэн саҕаланна. Бу сезон Аҕа дойду Улуу сэриитигэр Кыайыы 80 сылыгар ананар.

Тэрийээччилэр бэлиэтииллэринэн, бу күн 1939 с. ССРС Үрдүкү Сэбиэтин Президиумун Ыйааҕынан «Сэбиэскэй Сойуус Дьоруойа» мэтээл «Кыһыл көмүс Сулус» диэн уларытыллан ааттаммыта. Бу наҕарааданан тыһыынчанан эр санаалаах, хорсун дьоммут наҕараадаламмыттара.

Куонкуруска кыттааччылар 3 мүнүүтэттэн ордуга суох уһуннаах видеоролигы устуохтаахтар уонна RUTUBE видео-порталыгар угуохтаахтар. Видеоҕа бэйэҕит эһээлэргит, хос эһээлэргит, эбээлэргит, хос эбээлэргит Кыайыыны уһансыбыт кылааттарын: кинилэр ханна сэриилэспиттэрин, ханнык мэтээлинэн наҕараадаламмыттарын, дьоруойдуу быһыыларын, ону таһынан көлүөнэлэри сибээстиир дьиэ кэргэн устуоруйатын харайыы, о.д.а. туһунан кэпсиэхтээххит.

«Сыл аайы «Смотри, это Россия!» бырайыак кыттааччыта элбиир. Бу оҕо бырайыагын көмөтүнэн устуоруйаны, култуураны уонна дойду үгэстэрин үөрэтии өссө чэпчээтэ. Куонкурус соруга араас эрэгийиэн оҕолоро саҥа доҕоттору булаллара буолар», — диэн Ил Дархан Айсен Николаев эттэ.

Куонкуруска кыттарга https://lookitsrussia.ru портал нөҥүө алтынньы 16 күнүттэн сэтинньи 24 күнүгэр диэри регистрацияланыаха наада. Видеороликтары алтынньы 21 күнүттэн ылыы саҕаланыа.

Оҕолор хаачыстыбалаах, үчүгэй видероликтары усталларын наадатыгар, режиссердар, продюсердар уонна блогердар регистрацияламмыт кыттааччыларга анаан маастар-кылаастары ыытыахтара.

Аһаҕас куоластааһын түмүгүнэн кыайбыт оҕолор ахсынньы ыйга сыаналаах бириистэринэн наҕараадаланыахтара.

Куонкурус туһунан сонуннары
https://lookitsrussia.ru сайтка билсиэххитин сөп.

Санатан эттэххэ, «Смотри, это Россия!» куонкурус Саха сиринээҕи оҕо хамсааһынын активистарынан 2020 с. саҕаламмыта. Бырайыагы Ил Дархан Айсен Николаев өйөөбүтэ. РФ Үөрэҕин министиэристибэтэ, РФ Ыччатын министиэристибэтэ уонна да атын ыччат тэрилтэлэрэ өйөөбүттэрэ. Түөрт сыл иһигэр 95 000-ттан тахса оҕо кытынна. Бастакы куонкурус дойду 85 эрэгийиэнин бүтүннүү хаппыта.
Онно 3500 тахса хамаанда – 17 500 киһи кыттыбыта. Төрдүс сезоҥҥа 33 245 оҕо 89 эрэгийиэнтэн кыттыбыта.

Түөрт сыл иһигэр барыта 95 000 үөрэнээччи кытына. Куоластааһыҥҥа барыта 200 тыһыынча киһи кыттыбыта.