Снайпинг чөмпүйүөнүгэр Юрий Трутнев бирииһэ ыытылынна

Саха сириттэн байыаннай дьайыы буола турар сиригэр «Great Wall Poer» массыына барда. Бу инники кирбиигэ бойобуой соругу толоро сылдьар Уһук Илиҥҥи снайпинг чөмпүйэнээтин кыайыылааҕар Юрий Трутнев бирииһэ буолар.

Бу туһунан «Кыайыыга бииргэ!» өрөспүүбүлүкэтээҕи хамыыһыйа суһал ыстаабын координационнай киинин бэрэстэбиитэлэ Анна Меркурьева кэпсээтэ.

«Ааспыт нэдиэлэҕэ Аллараа Бэстээх бөһүөлэгиттэн байыаннай дьайыы буола турар сиригэр үс массыынаны, волонтерскай тэрилтэлэртэн гуманитарнай көмөнү, байыаннай сулууспалаахтар аймахтарын тус баһыылкаларын тиэммит өссө биир ыарахан ыйааһыннаах массыына айаннаата. Суһал ыстаап ахсынньыга өссө биир маннык массыынаны ыытар былааннаах. Байыастарга гуманитарнай көмө саҥа баартыйатын хомуйа сылдьабыт”, — диэтэ кини.