Снегоход атыылаһан абыранаары…

33 саастаах Алдан оройуонун олохтооҕо полиция үлэһиттэригэр кэпсээбитинэн,  кэргэнэ куйаар ситиминэн снегоход атыытын туһунан биллэриини түбэһэ көрбүт. Чита куоракка баар атыыһыты кытта сибээскэ тахсан, атыы-тутуу усулуобуйатын чопчулаһан,  дьахтар  550 тыһ. солк. ыыппыт. Ол кэннэ, атыыһыт кэргэнниилэргэ   экспедиторскай араспыыска диэни  ыыппыт. Ол күн киэһээ дьахтар харчы ыыппыт нүөмэрин бэрэбиэркэлээн тырааныспар хампаанньатын официальнай саайтыгар киирэн көрбүт. Ол онно көрбүтэ, нүөмэринэн харчыны ыытыллыбат, түөкүттэргэ түбэһиэххити сөп диэн сурулла сылдьар эбит.

Хас да күн буолан баран, дьахтар Читаҕа эрийэн,  экспедиторскай араспыыска нүөмэрин эппитигэр, тырааныспар хампаанньата туһааннаах нүөмэр  быстах кэмнээҕин уонна ону интэриниэт нөҥүө сакаастыахтарын сөбүн туһунан  быһаарбыттар. Итиэннэ  снегоходу тиэйии туһунан дьаһал киирбэтэҕин эппиттэр.  Хомойуох иһин, албыннаан атыылаабыт атыыһыт нүөмэрэ арахсан, «блокировкалана» сылдьар эбит.