Соболоох оскуолатыгар хапытаалынай өрөмүөн ыытыллыаҕа

Быйыл Муома улууһун Соболоох сэлиэнньэтин оскуолатыгар хапытаалынай өрөмүөн ыытыллыаҕа. Маннык иһитиннэриини вице-премьер Георгий Степанов салайааччылаах Саха сирин Бырабыыталыстыбатын Муома улууһун Соболоох сэлиэнньэтигэр ыыппыт отчуотугар билиһиннэрдилэр.

«Өрөспүүбүлүкэҕэ үөрэх тэрилтэлэрин материальнай-тэхиниичэскэй баазаларын саҥардыыга киэҥ хабааннаах федеральнай бырагыраама ситиһиилээхтик олоххо киирэр. Бу үлэни РФ бэрэсидьиэнэ Владимир Путин көҕүлээбит «Ыччат уонна оҕолор» национальнай бырайыагын чэрчитинэн ыытыллар уонна оҕолору, ыччаты үөрэтэргэ, иитэргэ табыгастаах, куттала суох уонна аныгылыы усулуобуйалары тэрийиигэ туһуланар», – диэн Саха сирин бырабыыталыстыбатын бэрэссэдээтэлин солбуйааччыта Георгий Степанов отчуотугар бэлиэтээтэ.

Георгий Степанов салайааччылаах өрөспүүбүлүкэ бырабыыталыстыбатын үлэлиир бөлөҕө бу күннэргэ Муома улууһун Кулун Өлбүт, Буор Сыһыы, Сааһыр, Чуумпу Кытыл, Соболоох уонна Хонуу сэлиэнньэлэригэр бырабыыталыстыба отчуоттарын ыытта. Улуус олохтоохторун уокка, хомунаалынай өҥөлөргө үрдүк тарыыптар, авиабилиэт субсидиятын боппуруостара долгуталлар.

Бырабыыталыстыба үлэлиир бөлөхтөрүн өрөспүүбүлүкэ бары муниципальнай тэриллиилэригэр тиийэн сирэй көрсөн отчуоттааһыннара кулун тутар саҕаланыытыгар Дьокуускайга түмүктэниэхтэрэ. Түмүк отчуот «Саха» НКИХ  ханаалларыгар тахсыахтара. СӨ Айсен Николаев эрдэ бэлиэтээбитинэн, маннык сирэй көрсөн кэпсэтии ньымата, ордук ыраах сытар, уустук суоллаах нэһилиэнньэлээх пууннарга, былаас уонна олохтоохтор икки ардыларыгар ыкса сибээһи олохтуурга наадалаах уонна туһалаах. Кини этэринэн, өрөспүүбүлүкэ үгүс олохтоохторо былаас бэрэстэбиитэллэрин кытта тыыннаах кэпсэтиини ордороллор, онно кинилэр нэһилиэнньэлээх пууннарын сайдыытын олохтоох боппуруостарын быһаарыыга сыһыаннаах ыйытыылары дьүүллэһэргэ кыах биэрэр.

Санатан эттэххэ, 2020 сылтан эрэгийиэҥҥэ 62 оскуола уонна 36 оҕо уһуйаана үлэҕэ киирдэ. 100-тэн тахса үөрэх эбийиэгэр хапытаалынай өрөмүөн ыытылынна. Үөрэх тэрилтэлэрин хапытаалынайдык өрөмүөннүүр киэҥ хабааннаах бырагыраама салҕаныаҕа. Уопсай үөрэхтээһин эйгэтигэр үлэ 6 эбийиэги хабыаҕа, онтон 5-һэ икки сыллаах, 1-дэ биир сыллаах  олоххо киириэхтэрэ. Ону таһынан былааҥҥа оскуола иннинээҕи үөрэхтээһин 6 эбийиэгин уонна орто профессиональнай үөрэх 3 тэрилтэтин өрөмүөннээһин киирэр, бу инфраструктураны саҥардарга уонна үөрэх эйгэтин хаачыстыбатын үрдэтэргэ кыах биэриэҕэ.