Соболоох оскуолатыгар успуорт саалата өрөмүөннэниэ

     Муомаҕа Соболоох оскуолатыгар успуорт саалатын өрөмүөннүөхтэрэ. Хапытаалынай өрөмүөнү быйыл саҕалыырга быһаардылар.

Эбийиэги СӨ Үлэҕэ уонна социальнай сайдыыга миниистири солбуйааччы Альбина Трубина салалтатынан Муомаҕа Бырабыыталыстыба отчуотугэр тиийбит дэлэгээссийэ көрдө-иһиттэ.

Оскуола 1973 сыллаахха тутуллубут, 2012 сыллаахха хапытаалынай өрөмүөн ыытыллыбыт. Оттон манна сыһыары успуорт саалатын 1989 сыллаахха туппуттар. Онтон ыла бу өртүгэр өрөмүөн диэн ыытыллыбатах, эбийиэк улаханнык эргэрбит.

Үлэ олохтоох көҕүлээһини өйүүр бырагырааманан саҕаланар. Бу үлэҕэ түөрт мөл. тахса суума муниципальнай бүддьүөттэн, ону таһынан өрөспүүбүлүкэттэн 1 мөл. солк. хос үбүлээһининэн көрүллэр. Истиэнэтин, муостатын, өһүөтүн, таһын саҥардыахтара, тустууктар дьарыктанар уонна тириэньэрдэр хосторун саҥалыы уларытан оҥоруохтара, түннүктэрэ, ааннара уларытыллар.

Оскуолаҕа билигин 38 оҕо үөрэнэр. Манна физкултуура учуутала «Арктика учуутала» бырагырааманан үлэлиир, оҕолор успуордунан көхтөөхтүк дьарыктаналлар. Саҥа кэлбит учуутал Чурапчытааҕы физкултуура институтун бүтэрээт манна анаммыт. Кини үөрэтэр, дьарыктыыр оҕолоро номнуо үчүгэй спортивнай түмүктэри көрдөрөн эрэллэр. Былырыын 9 кылаас үөрэнээччилэрэ успуорт национальнай көрүҥнэригэр өрөспүүбүлүкэтээҕи күрэскэ призердаабыттар, юношескай разрядтаммыттар.

Бу соҕотох успуорт саалата буолан, манна нэһилиэк ыччата эмиэ дьарыктанар. Оскуола дириэктэрэ Раиса Старкова саала саҥардылыннаҕына, спортивнай ситиһиилэр элбииллэригэр эрэнэр.

Уопсайынан, оскуолаҕа 27 учуутал үлэлиир. Манна «Арктика учууталын» таһынан, «Земскэй учуутал» бырагырааманан  үлэлиир педагогтар эмиэ бааллар. 2013 сыллаахтан оскуола агрохайысханан үлэлиир. Ааспыт 2022 сыллаахха үлэһиттэр бэйэлэрин күүстэринэн хотон туппуттар, онно икки ыанар ынахтаахтар, торбостордоохтор. Маны таһынан 30 сылгылаахтар, 25-тэн тахса кууруссалаахтар.

«Үөрэнээччилэр ордук саас уонна күһүн сүөһү көрүүтүгэр көмөлөһөллөр. Сайын лааҕырдар үлэлииллэр. Моркуоп, сүбүөкүлэ, күөх үүнээйи арааһын олордобут. Хортуоппуй олордор сирдээхпит, тэпилииссэлээхпит. Оскуола кэнниттэн үрдүк үөрэх кыһатыгар киирии үчүгэй. Элбэх оҕо киин куораттарга үөрэнэ барар. Сорохтор үөрэммит хайысхаларынан Дьокуускайга хаалаллар, АГАТУ уонна тыа хаһаайыстыбатын тиэхиньикумнарыгар киирэн үөрэнэллэр. Маныаха кыраларыттан үлэлии үөрэммит оҕолор бэйэлэрин бэйэлэрэ быһаарыналлар диэн эрэнэбин», — диэн этэр оскуола дириэктэрэ.

Маны сэргэ, оскуола 2022 сыллаахха  «Сыыппаранан үөрэтэр эйгэ» федеральнай бырайыакка кыттыбыт. Информатика хоһугар ноутбуктары уонна принтер ылбыттар.

СӨ Ил Дарханын уонна Бырабыыталыстыбатын пресс-сулууспата