Сочига Саха сирин волонтердара Аан дойдутааҕы ыччат бэстибээлигэр кыттыахтара

Сочига Аан дойдутааҕы ыччат бэстибээлигэр Саха сириттэн барыта 15 волонтер үлэлиэхтэрэ. Кинилэр номнуо бэстибээл ыытыллар «Сириус» былаһааккаҕа тиийдилэр уонна бэлэмнэнэ сылдьаллар. Бэстибээл кулун тутар 1-7 күннэригэр ыытыллыаҕа.

Бу туһунан Саха сирин доброволецтарын ресурснай киинин исписэлииһэ Евгений Амбросьев иһитиннэрэр диэн ulus.media суруйар.

«Биһиги волонтердарбыт бэстибээл бырагырааматын уонна волонтер хайдах үлэлиэхтээх балаһыанньаларын кытта билсистилэр. Ол курдук, кинилэр бэстибээл кэмигэр 15 араас хайысханан бэстибээл тэрийээччилэригэр көмөлөһүөхтэрэ, ол иһигэр тырааныспар логистикатын, куттал суох буолуутун, култуурунай тэрээһиннэри, дэлэгээссийэлэри аралдьытыыга, ону сэргэ кыттааччылары олорор уонна аһыыр сирдэнинэн арыаллыырга үлэлиэхтэрэ», — диэн санаатын үллэһиннэ.

Аан дойдутааҕы ыччат бэстибээлигэр волонтерга хандьыдааттар хас да түһүмэҕинэн талыллыбыттара. «Волонтердар бэстибээлгэ босхо үлэлиэхтэрэ. Оттон тэрийээччилэр кинилэри таҥаһынан-сабынан хааччыйыахтара, босхо аһы-үөлү тэрийиэхтэрэ, ону тэҥэ үлэлэрин түмүгүнэн бастыҥ волонтердарга Махтал суруктары туттарыахтара», — диэн Евгений Амбросьев кэпсиир.

Санатан эттэххэ, Саха сириттэн волонтердар СӨ Ыччат дьыалаларыгар уонна социальнай коммуникацияларга министиэристибэтин өйөбүлүнэн кытталлар.

Дойду Бэрэсидьиэнэ Владимир Путин Ыйааҕынан Аан дойдутааҕы ыччат бэстибээлэ кулун тутар 1-7 күннэригэр «Сириус» былаһааккаҕа Арассыыйаттан уонна тас дойдулартан 20 тыһыынча кэриҥэ эдэр лидердэри түмүөҕэ. Бэстибээл кыттыылаахтара араас эйгэ бэрэстэбиитэллэрэ —  кинилэр норуоттар икки ардыларынааҕы бииргэ үлэлээһиҥҥэ биисинэс, медиа, култуура, билим, үөрэҕирии, волонтер, аһымал, успуорт, ону тэҥэ уопсастыбаннай олох уонна оҕо тэрилтэлэрин ыччата.