Социальнай пуонда сэтинньигэ оҕо босуобуйатын төлөнөр кэмин чуолкайдаата

Сэтинньигэ бырааһынньык уонна өрөбүл күннэринэн сибээстээн, Социальнай пуонда оҕо босуобуйаларын болдьоҕун иннинэ ыытыаҕа.

Бигэргэтиллибит кыраапыгынан 3-с чыыһылаҕа киирэр босуобуйалар дьиэ кэргэҥҥэ сэтинньи 1 күнүгэр ыытыллыахтара.

«Бу биир кэлим босуобуйаҕа, үлэлээбэт төрөппүттэргэ биир сааһын аҥаарыгар диэри оҕону көрүү босуобуйатыгар, ыҥырыллыбыт байыаннай сулууспалаах оҕотугар босуобуйаҕа уонна 3 сааһыгар диэри бастакы оҕоҕо босуобуйаҕа сыһыаннаах», — диэн пуонда иһитиннэриитигэр этиллэр. Ону таһынан, үлэлиир төрөппүттэргэ биир сааһын аҥаарыгар диэри оҕону көрүүгэ ый аайы төлөнөр босуобуйа биир күн эрдэ, ол эбэтэр сэтинньи 8 күнүгэр буолбакка, 7-с күнүгэр киириэҕэ.

3 сааһыгар диэри оҕоҕо ийэ хапытаалыттан төлөбүр кыраапыктан уларыйан, сэтинньи 5 күнүгэр киириэҕэ. Социальнай пуондаҕа санаттылар: төлөбүрдэр ааспыт ый иһин саҥа ыйга ыытыллаллар. Сэтинньигэ дьон алтынньы ыйдааҕы босуобуйаларын ылыахтара. Буоста нөҥүө босуобуйалар үлэ кыраапыгыттан көрөн, ый 3-с күнүттэн 25-с күнүгэр диэри тиийэллэр.