Социальнай ситимнэргэ тарҕаммыт видеоҕа эдьиийдии-балыс айдаарсыбыттар

Бу күннэргэ социальнай ситимҥэ оҕотугар хаһыытыыр, охсуох буолан суоһурҕанар ийэ видеота киэҥник тарҕанна, онуоха быһылааны тустаах уорганнар хонтуруолга ылбыттарын туһунан эрдэ иһитиннэрбиппит.

ИДьМ пресс-сулууспата иһитиннэрбитинэн, быһылаан Үөһээ Бүлүүгэ эдьиийдии-балыс икки ардыгар тахсыбыт. Быһаарыллыбытынан, улахан кыыс 15 саастаах эбит. Сэтинньи 25 күнүгэр оскуолаттан дьиэлээн испиттэр. Ол иһэн бастакы кылааска үөрэнэр кыра кыыс мороженай сиэн баҕарбыт, онуоха эдьиийэ аккаастаабытыгар хаппырыыстаан ытаабыт. 15-тээх кыыс ону тулуйбакка, ньиэрбинэйдээбит. Кыргыттар ийэлэрэ Дьокуускайга үөрэҕэр сылдьар, оҕолору эбэлэрэ көрө хаалбыт.

«Улахан кыыстыын өйдөтөр бэсиэдэ ыытылынна», — диэн ИДьМ иһитиннэрэр.