Социальнай сулууспа 105 сылын бэлиэтээтилэр
![](https://sakha-sire.ru/wp-content/uploads/2023/06/socz-sluzhba-900x596.jpg)
Бэс ыйын 8 күнүгэр Арассыыйаҕа социальнай сулууспа тэриллибитэ 105 сылын уонна Социальнай үлэһит күнүн бэлиэтээтилэр.
![](https://sakha-sire.ru/wp-content/uploads/2023/06/bez-nazvaniya-13.jpeg)
Дьокуускайга Ю.А. Гагарин аатынан Култуура, аныгы ускуустуба киинигэр үөрбүт-көппүт, киэргэммит социальнай үлэһиттэр тоҕуоруһа муһуннулар. Бу дьоро киэһэ ырыа-үҥкүү, кэнсиэр сүргэни көтөхтө. 50-тан тахса социальнай үлэһиттэр миниистири солбуйааччы Афанасий Постниковы кытта сыанаҕа тахсан, кэчигирэһэн туран, хуордаан ньиргиппиттэрэ уратытык көһүннэ. Бу кинилэр бары өттүнэн талааннаахтарын, олоххо киэҥ интэриэстээхтэрин көрдөрөр.
Саха сирин социальнай үлэһиттэрин РФ Үлэҕэ, социальнай көмүскэлгэ миниистирэ Антон Котяков видеонан эҕэрдэлээтэ.
СӨ бырабыыталыстыбатын аатыттан бэрэссэдээтэл Андрей Тарасенко эҕэрдэ тылы эттэ:
— Киһи бэйэтин олоҕор араас ыарахаттары көрсүөн сөп. Оннук түгэҥҥэ эһиги сылаас ытыскытыгар түһэрэн, көрөн-истэн, бүөбэйдээн, салгыы олороругар көмөлөһөр, үтүөнү эрэ тарҕатар дьоһун идэлээх дьон буолаҕыт. Эһиги үлэҕит уопсастыба олоҕор олус туһалаах. Онон үтүөнү оҥорбуккут уон оччонон бэйэҕитигэр эргиллэн кэллин, олоххутугар бары үчүгэйи эрэ баҕарабын, ис сүрэхпиттэн махтанабын, — диэн кини эттэ.
Социальнай сулууспалар үлэһиттэрэ бэйэлэрэ көмүскэллээх буолалларыгар, туохха наадыйаллара баар буоларыгар бырабыыталыстыба өттүттэн үлэ ыытылларын бэлиэтээтэ.
![](https://sakha-sire.ru/wp-content/uploads/2023/06/socz-sluzhba4.jpg)
![](https://sakha-sire.ru/wp-content/uploads/2023/06/socz-sluzhba3.jpg)
![](https://sakha-sire.ru/wp-content/uploads/2023/06/socz-sluzhba2.jpg)
![](https://sakha-sire.ru/wp-content/uploads/2023/06/socz-sluzhba1.jpg)
![](https://sakha-sire.ru/wp-content/uploads/2023/06/bez-nazvaniya-17.jpeg)
![](https://sakha-sire.ru/wp-content/uploads/2023/06/vms_3377.jpg)
![](https://sakha-sire.ru/wp-content/uploads/2023/06/vms_4014-960x640-1.jpg)
![](https://sakha-sire.ru/wp-content/uploads/2023/06/vms_2831.jpg)
Оттон бырабыыталыстыба бэрэссэдээтэлин солбуйааччы Георгий Степанов Үлэ сылыгар социальнай сулууспа 5 үлэһитэ уһулуччу үтүөлэрин-өҥөлөрүн иһин “Үлэ киһитэ” бириэмийэнэн наҕараадаламмыттарын туһунан иһитиннэрдэ.
— Саха сирин социальнай сулууспата баай устуоруйалаах. Үйэ тухары социальнай сулууспаҕа сүрүн сыаннас киһи буолара уларыйбат. Бүгүн биһиги дьоҥҥо сулууспалыыр идэни талбыт, үтүө сүрэхтээх дьон бырааһынньыгын бэлиэтиибит. Мин социальнай көмүскэл, дьарыктаах буолуу, социальнай хааччыйыы, Социальнай пуонда, мэдиссиинэ-социальнай эспэртиисэҕэ, уопсастыбаннай, аһымал түмсүүлэргэ үлэлиир кэлиэгэлэрбин эҕэрдэлиибин!
Социальнай сулууспалар үлэһиттэригэр улахан эппиэтинэс сүктэриллэн сылдьар – уопсастыбаҕа социальнай тэҥнэһии баар буоларын туһугар күнүстэри-түүннэри бэриниилээхтик үлэлиир, кыаммат араҥаҕа көмөлөһөр, олоххо, үтүөҕэ эрэли, тапталы иҥэрэр кэриҥнээххит. Эһиги баар буолан, Арассыыйа Социальнай сулууспаларын үбүлүөйдээх сылларын дьоһун түмүктэрдээх көрсөбүт, — диэн кини эттэ.
Бу дьоро киэһэ социальнай эйгэ бастыҥ үлэһиттэрэ судаарыстыбаннай наҕараадалары туттулар.
Сообщить об опечатке
Текст, который будет отправлен нашим редакторам: