Софья Александрова: «Сахабыт сирэ сайдарын туһугар үлэлииргэ улахан кыаҕы биэрдэ»

Бу нэдиэлэҕэ Дьокуускай куоракка Саха Өрөспүүбүлүкэтин муниципальнай тэриллиилэрин бэрэстэбиитэллээх уорганнарын дьокутааттарын II сийиэһэ түмүктэннэ уонна Саха Өрөспүүбүлүкэтин муниципальнай тэриллиилэрин сэбиэтин – Муниципалитеттар икки ардыларынааҕы бииргэ үлэлээһин ассоциациятын IX сийиэһэ үлэтин саҕалаата.

Нэһилиэктэртэн, улуустартан, куораттартан араас таһымнаах элбэх дьокутаат уонна баһылык кэлэн кытта сылдьар. Бүгүн дьокутааттар сийиэстэрин түмүгүнэн санаатын Амма улууһун дьокутааттарын оройуоннааҕы сэбиэтин бэрэссэдээтэлэ Софья Александрова санаатын маннык үллэстэр:

— Амма улууһуттан 17 дьокутаат буолан кэллибит. Үс күн тигинэччи үлэлээтибит. Бастакы күн нэһилиэктэрбит дьокутааттара эбии үөрэҕи ыллылар. Эдэр дьокутааттарга олус туһалаах, интэриэһинэй үөрэх буолла. Дьону кытары хайдах кэпсэтэргэ, бэйэни хайдах салайынарга, үлэлииргэ, дьон олоҕун хайдах тупсарарга тренинг, семинар, оонньуу быһыытынан билиини ыллылар. Биһиги үс “төгүрүк остуолга” көхтөөхтүк кытынныбыт.

Мин оройуон сэбиэтин бэрэссэдээтэлин быһыытынан эттэхпинэ, улууспутугар саамай тыҥааһыннаах кыһалҕабытынан сыбаалкабыт буолар. Саха киһитэ бары кэрэ Аммабытын харыстыаххайыҥ диир буоллаҕына, бүгүн, кырдьык, кутталлаах усулуобуйа үөскээтэ. Сыбаалкабыт кирдээх уута Амма өрүспүтүгэр түһэр кыһалҕата үөскээтэ, ол иһин биһиги ити сытыы боппуруоһу бастакынан туруордубут. Ыраастыыр ыстаансыйаны тутууну, аны туран баар сыбаалкабытын бүтүннүү суох оҥорон бараммыт, сири-уоту чөлүгэр түһэриини ыытыахпытын баҕарабыт, ол туһунан сийиэскэ этиннибит.

Аны туран, оройуон сэбиэтин дьокутаата Вера Коникова үүнэн эрэр көлүөнэҕэ оҕо саадыттан битэмиини иһэрдиини ыытыыны иккис боппуруоһунан туруорда. «Д» битэмиин киһи этигэр-сиинигэр олус наадалааҕын мэдиссиинэ дакаастаан, саҥаттан көрөр буолла. Онон биһиги мэдиссиинэ тэрилтэлэригэр ити битэмиини бэйэлэригэр оҥороллоро буоллар, быдан туһалаах, оҕолорбут чэгиэн буолуо этилэр диэн туруорустубут. Маны таһынан Амма улууһун дэлэгээссийэтэ Экэниэмикэ министиэристибэтигэр сылдьан, салалтаны кытары көрсөн, кэпсэтэн муниципальнай тэриллиилэр үлэһиттэрин хамнастарын үрдэтэри туруорустубут. Күн бүгүҥҥэ диэри муниципальнай үлэһиттэр хамнастара олус кырата сөхтөрөр. Тыа сирин сайдыытыгар түүннэри-күнүстэри үлэлии сылдьар дьон хамнаһа үрдүүрэ буоллар диэн баҕалаахпыт. Уопсайынан, сийиэс үлэтэ олус тыҥааһыннаахтык ааста, наадалаах боппуруостар турдулар. Сийиэс бары дьокутааттары, баһылыктары сомоҕолоото, Сахабыт сирэ сайдарын туһугар үлэлииргэ өссө биир улахан кыаҕы биэрдэ.