Софья Баранова «Үйэлээх үгэһи үксэтээччи” аатын сүктэ

Мэҥэ Хаҥалас улууһугар Олоҥхо ыйын чэрчитинэн,  СӨ үтүөлээх артыыската, режиссер, худуоһунньук, олоҥхону толорооччу Софья Иннокентьевна Баранова Майаҕа Д.Ф.Ходулов аатынан култуура киинигэр Мэҥэ Хаҥалас Хаптаҕай нэһилиэгин олоҥхоһута П.Г.Романов-Мыланыыскай «Кыыс Ньургустай» олоҥхотун толорон, олоҥхо дьоро киэһэтин бэлэхтээтэ.

Быйыл П.Г. Романов-Мыланыыскай төрөөбүтэ  130 сылынан олоҥхото киэҥ эйгэҕэ тарҕанна. Софья Иннокентьевна олоҥхону ураты тыыннаан толоруутун дьон-сэргэ дуоһуйа иһиттэ. Олоҥхо персонажтарын ырыатын тойугун кэрэтин сэргээтилэр, астыннылар.

Софья Иннокентьевнаҕа култуура уонна духуобунай сайдыы управлениетын методиһа Э.М.Павлова  Мэҥэ Хаҥалас улууһун эҕэрдэ суругун туттарда, Г.Г.Колесов аатынан Олоҥхо дьиэтин салайааччыта Е.Н.Иванова «Үйэлээх үгэһи үксэтээччи” үрүн көмүс бэлиэни  туттарда, Хаптаҕайтан Романов-Мыланыыскай биир дойдулаахтара, Мыланыыскай аймахтара махтанан сибэкки дьөрбөтүн бэлэх ууннулар, биир дойдулаахтара Ходоро нэһилиэгиттэн  аймахтара, бииргэ үөрэммит  кылааһынньыктара эҕэрдэлээтилэр.

Мэҥэ Хаҥалас олохтоохторо дьоро киэһээни бэлэхтээбит Софья Иннокентьевнаҕа саха олоҥхотун тарҕатар, сайыннарар айар үлэтигэр үрдүктэн үрдүк ситиһиилэри, кытаанах доруобуйаны, махталлаах көрөөччүлэри баҕардылар. Олоҥхо дьоро киэһээтин бэлэхтээбитигэр дириҥник махтаннылар.