Соҕуруу дойду спортсменнара хаары уонна мууһу сонурҕуу көрдүлэр

Филиппиныттан уонна Таилантан ахсынньы 14 күнүгэр ыытыллар «Вызов Севера» күрэхтэһиигэ кыттар боксердар бүгүн Дьокуускайга  саамай тымныы күн көтөн кэлэн, дойдубут тымныытын олуһун сөхтүлэр.

Киин куоракка бүгүн улаханнык тымныйан, хойуу туман түһэн, оҕолор үөрэммэтилэр. Онон соҕуруу дойду дьонун дойдубут биир ураты өрүтүн көрдөрөн, соһутта да, үөртэ да.

Боксердары киин куораттааҕы «Якутдорстрой» суолу көрөр-истэр үлэһиттэр кыһыҥҥы сылаас спецтаҥастарынан хааччыйдылар.  Сылаас дойду дьоно ордук муус уонна хаар оҥоһуктары олус сэргээтилэр.

«Хаар маннык буолар эбит дуу…» диэбиттии, бэркэ интэриэһиргээн көрбүттэрин-истибиттэрин «Спорт Якутии» телеграм-ханаал устубута социальнай ситимнэринэн тарҕанна.

Ыраахтан кэлэр дьону кыһыммыт тымныытынан, хаарынан, мууһунан мантан инньэ өссө  соһутуо турдаҕа.