“Соҕуруу Саха сирэ” ТОР  сайдыытын кэскиллээх былаанын бигэргэттилэр

Дьокуускайга Кэтээн көрөр сэбиэт мунньаҕар “Соҕуруу Саха сирэ” урутаан сайдар сир-уот (ТОР) кэскиллээх былаанын бигэргэттилэр.

«Биһиги баар чахчыларга тирэҕириэхтээхпит уонна урутаан сайдыы усулуобуйалара хайдах уларыйалларын көрүөхтээхпит. Итинтэн үлэ хаачыстыбата уонна бырайыагы былааннааһын тутулуктаахтар”, — диэтэ Ил Дархан Айсен Николаев.

-“Соҕуруу Саха сирэ” ТОР-га Уһук Илин уонна Арктика сайдыытын Корпорациятын сөбүлэһиитинэн,  бырайыагы 125 миллиард солкуобай инвестиция кээмэйинэн 20 резидент олоххо киллэрэр, биисинэс 10,2 тыһыынча оробуочай миэстэни таһаарар. Резиденнэр эрэгийиэн экэниэмикэтигэр 125,7 миллиард солкуобайы уктулар уонна 10,4 тыһыынчаттан тахса үлэ миэстэтин таһаардылар. Инвестордар РФ Илиҥҥи сайдыы министиэристибэтин, КРДВ, Саха сирин бырабыыталыстыбатын өйөбүллэринэн, бырайыактары ситиһиилээхтик толорорго наадалаах нолуок чэпчэтиилэригэр уонна административнай преференцияларга киирэр бырааптаахтар, — диэн КРДВ дириэктэрэ Дмитрий Борисов иһитиннэрдэ.

Былааҥҥа саҥа хайысхалар: экология бырайыактара, дьоҕус биисинэһи өйөөһүн, гражданскай инфраструктура сайдыыта уонна туризм салаата бааллар.

Мунньахха саҥа бырайыактары олоххо киллэрэргэ ТОР кыраныыссатын кэҥэтэр наадатын эмиэ дьүүллэстилэр. Айсен Николаев үлэ федеральнай таһымнаах стратегическай соруктары учуоттуохтааҕын бэлиэтээтэ.

СӨ Ил Дарханын уонна бырабыыталыстыбатын пресс-сулууспата