Хаартыска: sakha.gov.ru
Саха сиринээҕи муода брендтэрэ, ол иһигэр «Sokolnikov» бренда, федеральнай ырыынакка эрэллээхтик тахсаллар.
Бу ситиһии саха брендтэрин Арассыыйа ырыынагар үүнэр-сайдар кыахтарын көрдөрөр уонна эрэгийиэн дизайнердарын федеральнай таһымҥa таһаарар бырагыраама көдьүүстээҕин бигэргэтэр. Бу туһунан Саха сирин сайыннарыы корпорацията иһитиннэрэр.
Саха сирин сайыннарыы корпорациятын генеральнай дириэктэрэ Афанасий Саввин дойду Бэрэсидьиэнэ Владимир Путин эрэгийиэннэри олохтоох мааркалары өйүүргэ ыҥырбытын санатта. Афанасий Саввин 2024 сыллаахха Корпорация Beinopen Муода индустриятын сайыннарыы институтун кытта «Муода бырагыраамата: мааркалар, фабрикалар, ритейл» диэн ааттаах олохтоох мааркалары сайыннарар бырагырааманы үлэлэппитин туһунан иһитиннэрдэ.
«Бырагыраама сүрүн соруга – саха брендтэрэ улахан хампаанньа буола улааталларыгар көмөлөһүү. Биһиги маркалары бизнес-сыһыаҥҥа үөрэтэбит, фабрикалары кытта хайдах үлэлиири көрдөрөбүт, бэйэлэригэр атыылыырга бэлэм мааркаларын талар улахан федеральнай ритейлердэри (атыы-эргиэн ситимнэрин) ыҥырабыт. Бу мааркалар бэйэлэрин кэлиэксийэлэрин оҥорон таһаарарга чэпчэтиилээх кирэдьииттэри ылаллар.
Бырагыраама икки сезонун устатыгар 50 бренд үөрэҕи ааста, онтон 9-һун ритейлердэр таллылар, 4 маарка билиҥҥитэ Арассыыйа универмагтарыгар атыыланар, оттон өссө 5-һэ кэпсэтии түһүмэҕин ааһа сылдьаллар», – диэн Саха сирин сайыннарыы корпорациятын генеральнай дириэктэрэ кэпсээтэ.
2016 сыллаахха Юлия уонна Егор Сокольниковтар тэрийбит «Sokolnikov» брендтэрэ сөбүлүүр дьарыктарыттан үүнэн-үөскээн тахсыбыт. Саха сирин сайыннарыы корпорациятын бырагырааматыгар кыттан, «Sokolnikov» брендин олохтооччулара атыы-эргиэн ситимнэрин уонна фабрикалары кытта үлэлииргэ үөрэнэн, саҥа кэлиэксийэлэри оҥорон таһаарарга чэпчэтиилээх кирэдьииттэри ылар туһунан сөбүлэстилэр.
Юлия уонна Егор Сокольниковтар дизайнерскай киэргэллэр уонна аксессуардар биллэр универмагтарын — Poison Drop-у кытта сөбүлэҥҥэ илии баттастылар. Биир биллэр ситиһиинэн Юлия Сокольникова Экэниэмикэ үрдүкү оскуолатыгар ювелирнай дизайн бырагырааматын кураторынан анаммыта буолар.
Дьокуускайга элбэх кыбартыыралаах дьиэлэргэ сылааһы биэрии 100% хааччылынна. Бу туһунан Дьокуускай куорат баһылыгын солбуйааччы Владислав…
Хоту көһөрүллүү күнүн бэлиэтиир тэрээһиннэр чэрчилэринэн, Чурапчыга “Айылгы” НАДь фойетыгар Саха сиригэр соҕотох баталист-худуоһунньук Иван…
СӨ Быыһыыр сулууспата иһитиннэрбитинэн, балаҕан ыйын 17 күнүгэр 21.15 ч. Дьокуускай куоракка Сайсары күөлгэ 2000…
Амма сэлиэнньэтигэр Мир уулуссаҕа таба киирэн олохтоохтору соһутта. Туһааннаах видео бу күннэргэ социальнай ситиминэн тарҕанна.
"Путь воина" байыаннай-тактическай күрэхтэһиигэ бэҕэһээ Волгоградскай уобалас «Сталинград» уонна Тюменьскай уобалас «Соболь» хамаандалара күөн көрүстүлэр.…
«Чолбон» сурунаал балаҕан ыйынааҕы нүөмэригэр: - «Улуу Кыайыы айымньыларыгар» норуот суруйааччыта Николай Лугинов номоххо киирбит…