Сокуоннайа суох бөҕү тохпут таһаҕас таһар улахан массыынаны ыстарааптаатылар

СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтэ хонтуруоллуур-кэтээн көрөр дьаһаллары тиһигин быспакка ыытар. Рейдэ кэмигэр икки таһаҕас таһар улахан массыыналартан сокуоннайа суох көҥүллэммэт сиргэ бөҕү бырахпыттара биллибит.

Буруйу оҥорбут суоппардар РФ Административнай буруйу оҥорууга кодексатын 8.2 ыстатыйатын 3.3 чааһыгар олоҕуран административнай эппиэтинэскэ тардылыннылар, диэн СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтэ иһитиннэрэр. Кинилэргэ хас биирдиилэригэр 40 тыһыынча солкуобайдаах ыстараап түһэрилиннэ.

Сокуону кэһээччилэр сокуоннайа суох тохпут бөхтөрүн бэйэлэрэ хомуйан куорат сыбаалкатыгар таһаардылар.

Маннык сокуон кэһии иһин ыстараап көрүллэрин министиэристибэ бэлиэтиир:

• Чааһынай дьоҥҥо: 40-тан 50 тыһыынча солкуобайга диэри,
• Дуоһунастаах дьоҥҥо: 60-тан 80 тыһыынча солкуобайга диэри,
• Юридическай сирэйдэргэ: 100-тан 120 тыһыынча солкуобайга диэри.

РФ Административнай кодексатын 8.2 ыстатыйатын 3.4 чааһынан, хаста эмэ хатыланнаҕына, тырааныспар былдьанар уонна накаастабыл улаатар.

Хас биирдии киһи тулалыыр эйгэни харыстааһыҥҥа кыттыан сөп. Улахан грузовиктар бөҕү-сыыһы көҥүллэммэт сиргэ тоҕоллорун көрдөххүтүнэ, быһылаан чопчу күнүн-ыйын, бириэмэтин уонна аадырыһын, ону тэҥэ сокуону кэһээччи массыынатын судаарыстыбаннай нүөмэрдэрин ыйан, быһылааны хаартыскаҕа эбэтэр видеоҕа устан ыытыаххытын сөп. Ону министиэристибэ ТГ-ханаалын анал чат-ботутугар ыытыҥ.

СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтэ өрөспүүбүлүкэ олохтоохторун айылҕа харыстабылыгар уонна нэһилиэнньэ доруобуйатыгар кыттыһарга ыҥырар.