Сокуоннайа суохтук лотереяны тэрийбит киһиттэн суут 18 мөл.солк. ирдээтэ

Дьокуускайга 2022 сыл ахсынньы 7 күнүттэн 2023 сыл ахсынньы 23 күнүгэр диэри урбаанньыт «Өрөгөй» диэн ааттаан, лотереяны сокуоннайа суохтук ыыппыт. Саха сирин олохтоохторугар барыта 17 984 945 солкуобай суумаҕа билиэт атыыламмыт диэн yakutia-daily.ru суруйар.

Борокуруор бэрэбиэркэтэ быһаарбытынан, урбаанньыт нолуок уорганнарыгар полиграфическай өҥөлөрү оҥорор урбаанньыт быһыытынан регистрацияламмыт, онон кини лотерея тэрийэр бырааба суох. Арассыыйа сокуонунан, лотереялары судаарыстыбаннай былаас уорганнара көҥүллээтэхтэринэ эрэ ыытыллаллар.

Онон борокуратуура урбаанньыт лотерея тэрийбитин сокуоннайа суоҕунан ааҕан, суукка иск түһэрбит. Итиэннэ надзордуур тэрилтэ судаарыстыба суотугар 17 984 945 солкуобайы ирдээбит. Суут маны утарбатах.