Киһини уураппыт тэрилтэ харчы төлөөтө

Бүлүү улууһугар «Сыа-Бүлүү» тэрилтэҕэ былырыын олунньу ыйга эр киһи эчэйии ылан сиһин тоһуппута.

Ити кэнниттэн кинини үлэтиттэн уураппыттар. Ылбыт эчэйиититтэн уһун кэм устата эмтэммит. Маны сэргэ эр киһи ылбыт эчэйиититтэн сылтаан сатаан үлэҕэ киирбэтэх. Кини икки кыра оҕолоох эбит.

Бүлүү улууһун борокуратууратын ирдэбилинэн эмсэҕэлээбит эр киһини үлэттэн ууратыы бирикээһэ сокуона суоҕунан ааҕыллыбыт. Онон үлэ биэрээччи моральнай хоромньуну төлүүрүгэр тиийбит. Моральнай хоромньу суумата 400 тыһ.солкуобайга тэҥнэспит. Оттон ыалдьан олорбут кэмигэр хамнаһын сууммата 186 тыһыынчаҕа тэҥнэспит. Онон эр киһиэхэ уопсайа 586 тыһ.солкуобайы төлөөбүттэр диэн СӨ Борокуратууратын пресс-сулууспата иһитиннэрэр.