Сокуону кэһиилээх сир баайын хостооһун тохтотуллубут

Ленскэй улууһугар доломит тааһы хостуур сиргэ, сир баайын хостооһунунан дьарыктанар икки тэрилтэ сокуону кэспиттэр. Ол түмүгэр, СӨ Айылҕа харыстабылын борокуратууратын бэрэбиэркэлиир матырыйаалларыгар олоҕуран, холуобунай дьыала тэриллибит.

Бу туһунан СӨ Борокуратуурата телеграм-ханаалыгар биллэрэр.

Ол курдук, Ленскэй улууһугар “Улахан Мурбай” диэн доломит тааһы хостуур сиргэ, сир баайын хостооһунунан дьарыктанар икки тэрилтэ сокуону кэһэн хостооһун үлэтин ыыппыттар. 15 тыһ. м3 иэннээх сир баайын хостоон, 3 мөлүйүөн солкуобайтан тахса дохуот киллэриммиттэр. Хостоммут доломиты Нүүйэ үрэҕи туоруур муостаны оҥорууга туһаҕа таһаарбыттар.

Бу сокуону кэһии утары хомуллубут матырыйааллар СӨ Силиэстийэлиир Кэмитиэтигэр бэриллибиттэр. Арассыыйа Холуобунай кодексын 171 ыстатыйатын 2 чааһыгар, “б” пуунугар ыйыллыбыт сокуонугар олоҕуран холуобунай дьыала тэриллибит. Ону кытта борокуратуура сир баайын хостооччулары утары айылҕаҕа хоромньуну оҥоруу иһин 19 мөлүйүөн солкуобайы төлүүрү ирдээбит.