Соморсуҥҥа арҕахха киирбэтэх тыатааҕыны бултаатылар

Бүгүн Амма улууһун Соморсунугар тыатааҕыны өлөрбүттэрин туһунан видео тарҕанна. Онон сибээстээн, СӨ Экологияҕа, айылҕаны туһаныыга, ойуур хаһаайыстыбатыгар министиэристибэтин Амма улууһунааҕы экологияны судаарыстыбанан кэтээн көрүүгэ иниспиэксийэтин салайааччыта Евгений Егоров маннык хоруйу “Саха сирэ” хаһыат саайтыгар биэрдэ:

— Кырдьык, арҕахха киирбэтэх эһэни алтынньы 16 күнүгэр көҥүлүнэн (докумуонунан) бултаммыта. Тыатааҕы хаампыт суолун-ииһин көрбүттэрин туһунан Соморсун нэһилиэгин дьаһалтатын баһылыга иһитиннэрбитэ. Ол кэнниттэн бултуурга көҥүлү биэрбиппит. Онон кырдьаҕаһы ыппыттара. Бу адьырҕа кыыл олус дьүдьэх, үөннээх курдук этэ. Онон патологическай матырыйаалын үөрэтэллэригэр Биология институтугар ыытыахпыт. Амма оройуонугар сылгы баазаларын уонна нэһилиэнньэлээх пууннар тастарыгар тыатааҕы сылдьыытын бу иккис түгэнинэн буолар.