«Сообщество» Уопсастыбаннай палаата пуорумугар бэлэмнэнии саҕаланна

Атырдьах ыйыгар Саха сиригэр Арассыыйатааҕы “Сообщество” диэн Уопсастыбаннай палаата пуорума ыытыллыаҕа. Ыам ыйын 4 күнүгэр Ил Дархан уонна СӨ Бырабыыталыстыбатын дьаһалтатын салайааччы Георгий Михайлов уонна Уопсастыбаннай Палаата аппараатын салайааччы Николай Доронин Дьокуускайга бу тэрээһиҥҥэ бэлэмнэнэр мунньаҕы ыыттылар.

Мунньахха Арассыыйа Уопсастыбаннай Палаататын бэрэстэбиитэллэрэ кэлэн кыттыыны ыллылар. Уопсастыбаннай Палаата аппараатын салайааччы Николай Доронин этэринэн, “Сообщество” пуорум 2015 сылтан саҕалаан ыытыллар. Бу сылга пуорумнар Дьокуускайга, Воронежка, Самараҕа уонна Вологдаҕа ыытыллыахтара. Түмүктүүр пуорум Москваҕа Кыайыы мусуойугар Сомоҕолоһуу күнүгэр буолуоҕа. Аҕыс сыл иһигэр бу тэрээһин 44 куоракка ыытыллыбыт,  75 тыһыынча киһи кыттыбыт. 5 тыһыынча кэриҥэ эспиэр, 35 тыһыынча волонтер пуорум үлэтигэр көмөнү оҥорбуттар.

Саха сиригэр бу пуорум бастаан ыытыллыбыт сылыгар, 2015 сыллаахха ыытылла сылдьыбыта. Бу сырыыга араас эйгэттэн 700 кэриҥэ кыттааччы атырдьах ыйын 1-2 күннэригэр ырытыыга кыттыахтара.