Дүпсүннэр сопхуос ыһыаҕар түмүстүлэр

От ыйын 5 күнүгэр Уус Алдан улууһугар Дүпсүн сопхуос 50 сылыгар аналлаах ыһыах ыытылынна.

Ааспыт үйэ 70-с сылларыгар модун кыахтаах Сэбиэскэй Сойуус элбэх ахсааннаах норуоттарын биир ситимҥэ тутан олорор эрдэттэн былааннанан оҥоһуллубут экэнэмиичэскэй өттүнэн үбүлээһин, өйөөһүн тыа сирин олохтоохторун үлэнэн, хамнаһынан хааччыйан сопхуостары тэрийэн биир экэнэмиичэскэй сибээһинэн тыа сирэ балысханнык сайдан иһэр кэмэ этэ.

Ааспыт 60-с сылларыгар алаастарынан олорбут кыра бытархай колхуостары холбооттооһун саҕана кэлин өрөспүүбүлүкэҕэ тиийэ үчүгэй үлэлээҕинэн биллибит Дүпсүн сопхуос тэриллибитэ. Бу сопхуос тэриллибитэ лоп курдук 50 сылын туолла. Бу кэм тухары төһөлөөх киһини үлэнэн-хамнаһынан хааччыйан олохторун уйгутун оҥороллоругар тирэнэр тирэхтэрэ, эрэнэр эрэллэрэ буолбута буолуой?
Быһаччы эттэххэ бөһүөлэккэ баар тэрилтэлэри уонна онно үлэлиир дьону, ыаллары, онон сыалай бөһүөлэктэри социальнай экэнэмиичэскэй өттүнэн өйөөн сопхуостар улахан эппиэтинэһи сүгэн олорбуттара.
Маны барытын өйдөөн сопхуос саҕана бииргэ үлэлээбит атастарын, доҕотторун көрсөн ол саҕанааҕы кэрэ-бэлиэ кэмнэрин ахтан-санаан ааһаары быйыл, от ыйын 5 күнүгэр, Дүпсүн сопхуос тэриллибитэ 50 сылын туолар үбүлүөйдээх бэлиэ күнүгэр сахалыы сиэринэн ыһыах ыстыбыт диэн дойдубуттан билэр дьонум сонуннарын суруйаллар.

Дүпсүн сопхуос үгэннээн үлэлээбит кэмнэригэр Остуойка, Бээди ,Чэриктэй, Өнөр диэн сүрүн учаастактарын таһынан хапытаалынай тутуу хотоннордоох, дьиэлэрдээх төһө баҕарар сүөһүнү мэччитэргэ айылҕа анаан биэрбит алаастардаах Ампаардаах, Дабаадыма учаастактарынан тэнийэн олорбута. Элбэх ахсааннаах сайыҥҥы пиэрмэлэр бааллара.

Манна бааллара чөмпүйүөн суоппардар, тырахтарыыстар, ыанньыксыттар, үлэ бастыҥнара, кыһыннары муҥхалыыр муҥхаһыттар биригээдэлэрэ, күндү түүлээҕи бултуур үүтээҥҥэ кыстыыр кадровай булчуттар.

Сопхуоспут үбүлүөйүгэр кэлбит дьон бары биир дьиэ кэргэн оҕолорун курдук истиҥник ирэ-хоро кэпсэтэн астынан тарҕастылар. Маны барытын иилээн-саҕалаан тэрийбит дьоҥҥо барыларыгар махтал мааны тылларын этэбит уонна кэлэр үбүлүөйдээх сылга көрсүөххэ диэри диибит.

Ыһыахха сылдьыбыт дьон бары күрэхтэһиилэргэ көхтөөхтүк кыттан, барытыгар миэстэлэһэн ситиһиилээх, үчүгэй сырыы буолла. Эбиэт кэмигэр сопхуоспут дириэктэрэ Иннокентий Васильевич Бочкарев үбүлүөй мэтээллэрин туттартаата.

Күрэхтэһиигэ сүүрүүгэ 60 үөһээ саастаахтарга Дмитрий Сивцев ,Марианна Бочкарева 3 м. буоллулар.  ⁠59 диэри сүүрүүгэ Дмитрий Сивцев 3 м. ылла. Дуэтынан ырыаҕа Анна Алексеева,Ульяна Павлова 1 м., Анна Лугинова, Светлана Алексеева 2 м. ⁠Саха таҥаһыгар Татьяна Константиновна анал бириис. ⁠Эстэпиэтэ кыттыылаахтара Бээди отделениетыттан Аграфена Алексеева, Марианна Бочкарева, Семен Бурнашев, Дмитрий Сивцев, Валерий Алексеев, Ньургустаана Вырдылина 6 түһүмэхтээх күрэскэ 1 миэстэ, 2 миэстэ автопаарка, 3 миэстэ Чэриктэй хамаандалара буоллулар диэн сонуннарын суруйаллар. Ону тэҕэ бары наҕараадаламмыт дьонноругар истиҥ эҕэрдэлэрин тиэрдэллэр.

Иван Сивцев — Бээди.

Хаартыскалар Матрена Бочкарева тиксэриилэрэ