Сордоҥнооххо байыаннай дьайыы кыттыылааҕын кэриэһигэр айар бөлөхтөрү көрүү буолла

Бу күннэргэ Өймөкөөн улууһун Сордоҥноох нэһилиэгэр байыаннай дьайыыга сылдьыбыт “Хорсунун иһин” уордьан кавалера Максим Готовцев сырдык кэриэһигэр анаммыт улуустааҕы «Парад премьер» театральнай көстүүлэр бастакы улуустааҕы тэрээһиннэрэ буолан ааста.

Максим Готовцев олоххо олус көхтөөҕө — олохтоох Култуура дьиэтигэр буолар бары тэрээһиннэргэ актыыбынай кыттыыны ылара. Ордук кини сценкаларга, театральнай көстүүлэргэ табыллан оонньуура. Максим Владимирович  төрөөбүт күнүгэр кэргэнэ Марианна Готовцева улуустааҕы театральнай көстүүлэри туруорар айар кэлэктииптэр күөн күрэстэрин көҕүлээн тэрийдэ:

— Куонкуруска улуус биэс нэһилиэгиттэн үс айар бөлөх кытынна. Төрүт нэһилиэгин олохтоохторо сырыы-айан ыраах уонна уустук буолан, кэтэхтэн видео ыытан кыттыыны ыллылар. Томтортон, Өймөкөөнтөн уонна Сордоҥноохтон кэлбит артыыстар биирдии сценка уонна монолуок аахтылар. Дьүүллүүр сүбэҕэ хас биирдии нэһилиэк бэрэстэбиитэллэрэ үлэлээтилэр. Куонкурус түмүгүнэн Гран-при хаһаайыттарынан Өймөкөөн нэһилиэгин самодеятельнай артыыстара буолан, дьиэлэригэр холодильник тиэнэн бардылар. 1-кы истиэпэннээх лауреатынан Сордоҥноох нэһилиэгин артыыстара буолан, тэлэбиисэргэ тигистилэр. 2-с  миэстэҕэ Томтор нэһилиэгин айар бөлөҕө тахсан, микроволновка уонна 3-с миэстэҕэ Төрүт нэһилиэгин артыыстара тиксэн, паарынан үлэлиир өтүүгү ыллылар.

Ити курдук, биирдиилээн дьахтар, эр киһи бастыҥ оруолларыгар, ураты режиссерскай үлэҕэ, сцена киэргэтиитигэр сыаналаах бириистэри туттардыбыт.

Бириистэри Максим Владимирович хаан-уруу аймахтара кыттыһан туруордубут. Нэһилиэк баһылыга, кэргэним үлэлээбит тэрилтэтэ “Теплоэнергосервис” АУо Сордоҥноохтооҕу филиала, доҕотторо — орто көлүөнэ дьон, Винокуровтар дьиэ кэргэннэрэ анал бириистэри туруоран өйөөбүттэригэр истиҥ махталбытын тиэрдэбит.

Айан-сырыы суох кэмигэр, такситтан таксига тиксиһиннэрэн, суоппардар Илья Атласов, Илгэн Винокуров  уонна Карим Атласов  байыаннай дьайыыга сылдьан суох буолбут биир дойдулаахтарын кэриэстээн, итиччэ элбэх бириис-таһаҕаһы буор босхо тиэйэн аҕалбыттара. Кубоктары, дипломнары,сэртипикэттэри оҥорууга куоракка олорор биир дойдулаахпыт Мария Максимова сүүрэн-көтөн оҥотторон ыыппыта.   Биир дойдулаахтарым Төрүт олохтоохторо, төһө да кэлбэтэллэр, миигин өйөөн, видео ыытан кыттыбыттара, сүтүктээх киһи санаабын эмиэ көтөхтө.

Бу бастакы куонкуруспут олус табыллан, тэрээһиннээхтик барда. Суолталаах тэрээһини ыытарбар көмөлөспүт Сордоҥнооҕум бар дьонугар барҕа махталбын тиэрдэбин.

Екатерина Дягилева нэһилиэкпит бары тэрээһиннэрин видеоҕа устан үйэтитэр  буолан, Максим Владимирович оонньоон хаалларбын сыаҥкаларын көрдөрдүбүт. Чугас киһибитин олох аттыбытыгар баар курдук санаппытыгар Екатерина Тимофеевнаҕа истиҥ махталбытын тиэрдэбит.

Бу айар куонкуруһу сыл аайы ыытыахпыт диэн санааҕа кэллибит. Киһи олоҕор оҥорбут үтүө дьыалатынан бар дьонугар үтүө өйдөбүл буолан хааларын Максим Готовцевка анаммыт тэрээһин бигэргэттэ.