Сорох биэнсийэлээхтэр төлөбүрдэрэ олунньутуттан 29%-нан үрдүөҕэ

2026 сыл олунньутугар сорох категорияҕа киирэр биэнсийэлээхтэр биэнсийэлэрэ үрдүүрэ күүтүллэр. Сорох дьоҥҥо биэнсийэ улаатыыта 29% тэҥнэһиэ диэн экэнэмиис Игорь Балынин «Газета.Ру»-га иһитиннэрдэ.

Бастатан туран, төлөбүр улаатыыта тохсунньуга 80 саастарын туолбут дьону хабар. Кинилэргэ страховой биэнсийэ төлөбүрэ (сайабылыанньа толорбокко эрэ) икки төгүл улаатар уонна көрүү-харайыы иһин эбии төлөбүр эбиллэр. Түмүгэр сорох биэнсийэлээхтэр биэнсийэлэрэ 29%-нан тиийэ улаатыан сөп.

Эспиэр сүрүн холобурунан, былырыын ахсынньы ыйга төлөбүр 35,1 тыһ. солк. эбит буоллаҕына, тохсунньутааҕы индексация кэнниттэн 37,7 тыһ. солк. буолбут. Оттон олунньуга, 80 сааһын туолбутун кэннэ, биэнсийэ кээмэйэ 48,7 тыһ. солк. диэри улаатар.

Иккис бөлөх — өр сыллаах үлэ иһин биэнсийэҕэ эбии төлөбүрдэри ылааччылар:

• гражданскай авиация көтөр аалларын экипажтарын чилиэннэрэ (эр дьоҥҥо 25 сылтан, дьахталларга 20 сылтан итэҕэһэ суох үлэ ыстааһа ирдэнэр);
• чох бырамыысыланнаһын үлэһиттэрэ (хостооһуҥҥа эбэтэр шахта тутуутугар 25 сылтан итэҕэһэ суох, сорох идэлэргэ – 20 сылтан).

Бу категорияҕа эбии төлөбүрдэр улаатыыта киһи аайы тус-туһунан буолуо уонна, холобур, бу сыл бүтүүтүгэр киирбит сайабылыанньалар быһыытынан урут учуокка ылыллыбатах дааннайдар учуоттаннахтарына оҥоһуллуо.