Сорох сиринэн инчэҕэй хаар уонна күүстээх тыал түһүөҕэ

Ыам ыйыгар, муус барарыгар халлаан араастаан уларыйар. Бу күннэргэ сорох сирдэринэн инчэҕэй хаар уонна сөкүүндэҕэ 20-25 миэтэрэҕэ тиийэ тыал түһүөҕэ.

Саха сирин баһыйар үгүс өттүгэр антициклон турар. Онтон өрөспүүбүлүкэ соҕуруу өттүгэр Кытай хоту өртүттэн циклон кэлэн, бүгүн Нерюнгригэ хаардаата дэһэллэр. Бу күннэргэ соҕуруу диэки сөҥүү түһэрэ намтыаҕа, былыттаах халлаан туруоҕа. Лаптевтар муораларынан улахан циклон ааһан, инчэҕэй хаар уонна сөкүүндэҕэ 20-25 миэтэрэҕэ тиийэ тыалырыаҕа. Субуота диэки өрөспүүбүлүкэ арҕаа өттүгэр, нэдиэлэ бүтүүтэ, бэнидиэнньиккэ киин улуустарга халлаан уларыйыаҕа.