«Сосновай борга» өрөспүүбүлүкэ «өрүөлчээннэрэ» күрэхтэһэллэр

Бу саас ыытыллыбыт «Содружество Орлят Республики Саха (Якутия)» куонкурус эрэгийиэннээҕи түһүмэҕэр Мииринэй улууһун аатыттан Арыылаах сэлиэнньэтин 6-с №-дээх оскуолатын үһүс кылааһын үөрэнээччилэрэ кыттыбыттара. Өрөспүүбүлүкэ 16 оройуонун оҕолоро «Сосновый бор» сынньалаҥ уонна чэбдигирдии киинигэр путевка иһин күрэхтэспиттэрэ.

Манна куонкурус видеоконференц-сибээс нөҥүө түөрт түһүмэҕинэн ыытыллыбыта: «Визитная карточка», «Викторина «Разговоры о важном», «Коллективно-творческое дело» уонна «Свободный микрофон». Бу түмүктэринэн Мария Викторовна Афанасьева салайааччылаах Арыылаах оскуолатын хамаандата үһүс миэстэ буолары ситиспитэ.

Мииринэй «өрүөлчээннэрэ», «Содружество Орлят России» эрэгийиэннээҕи сүүмэрдиир түһүмэх кыайыылаахтара, аны ыам ыйын 30 күнүттэн «Сосновый борга» кэлэн, «Карусель» өрөспүүбүлүкэтээҕи хамаанданан оонньуу түмүктүүр түһүмэҕэр кытталлар. Бу оонньууну Илья Чаҕылҕан аатынан Нам орто оскуолатын кэлэктиибэ тэрийэр.

Бэс ыйын 1 күнүттэн смена кыттааччыларыгар өрө күүрүүлээх күннэр саҕаламмыттара. Оҕолор сарсыардаттан «Саха» НКИХ биэриитигэр уһуллубуттара, араас бырагыраамаларга кыттыбыттара. Күрэхтэһээччилэри эҕэрдэлии диэн Уопсай үөрэхтээһин, иитии уонна эбии үөрэхтээһин эйгэтигэр судаарыстыбаннай бэлиитикэ департаменын салайааччытын солбуйааччы Надежда Захарова, СӨ ыччат дьыалаларыгар уонна социальнай коммуникацияларга миниистирин солбуйааччы Андрей Сосновскай, «Сосновай бор» киин дириэктэрин солбуйааччы Галина Слепцова, «Росдетцентр» исписэлииһэ, «Навигаторы детства» киин салайааччытын э.т. Вера Павлова, «Бастакылар хамсааһыннара» эрэгийиэннээҕи салаатын исписэлииһэ Наталья Луковцева кэллилэр.

Күрэхтэһии финала «Орлята России» бырагыраама хайысхаларынан ыытылынна («Орлёнок-мастер», «Орлёнок — эрудит», «Орлёнок — спортсмен», «Орлёнок- эколог», «Орлёнок – хранитель исторической памяти», «Орлёнок — лидер»). Дьүүллүүр сүбэ быһаарыытынан түмүк маннык буолла:

1 миэстэ — А.Г. уонна Н.К. Чиряевтар ааттарынан Дьокуускайдааҕы национальнай гимназиятын 4 «в» кылааһа;

2 миэстэ — Бүлүү 1-кы №-дээх оскуолатын 4 «г» кылааһа;

3 миэстэ — Мииринэй улууһун Арыылаах оскуолатын 3 кылааһа.

Оҕолору бу күннэр устата чаҕылхай бырагыырама күүтэр. Кинилэргэ анаан киин вожатайдара квестэри, квизтэри, флешмобтары, үҥкүүлэри уо.д.а. бэлэмнииллэр.

Ольга Ефремовна Габышева, Мария Викторовна Афанасьева.