Спартак Колесов: Ыччаты байыаннай сатабылларга иитэр сорук турар

Нерюнгрига «Оҕо айар дьоҕурун сайыннарар Киин” (дириэктэр Дарига Ахметова) эбии үөрэхтээһин улуустааҕы тэрилтэтин иһинэн үлэлиир «Юнармия» оройуоннааҕы ыстаабын салайааччыта Спартак Колесов ыччаты патриотическай иитии, оскуола бырагырааматыгар алын сүһүөх байыаннай үөрэхтээһини киллэрии, байыаннай сатабылларга иитии-үөрэтии тустарынан тус көрүүлэрин, байыаннай патриотическай кулууптар үлэлэрин кэпсээтэ.

— Байыаннай патриотическай кулууптарбыт үлэлэригэр икки сыл устатыгар коронавирус сыстыганнаах дьаҥа улаханнык мэһэйдээн, үлэ тохтуу, атахтана сырытта. Бу икки сылга оҕолор успуордунан да, араас күрэхтэһиилэринэн да аанньа дьарыктамматахтара быйылгы ыытыллыбыт күрэхтэһиилэргэ көстөр. Бэһистэн онуска диэри кылаас оҕолоро сыл ахсын бинтиэпкэнэн ытыыны, строевой хаамыыны элбэхтэ дьарыктанан, сатабылларын чочуйан иһиэхтээх этилэр. Билигин ол дьарыктарбытын сөргүтэ сылдьабыт. Байыаннай патриотическай кулууптарбыт толору кээмэйинэн үлэлээн эрэллэр. Төһө да учууталлар уонна оҕолор ити ааспыт икки сылга тэйэ быһыытыйдаллар, урукку тэтимнэригэр киирэн эрэллэрэ үөрдэр.

Дойду бырабыыталыстыбата оскуолаҕа начаалынай байыаннай үөрэхтээһини (НВП) үөрэтии-иитии бырагырааматыгар киллэрээри гынара олус сөптөөх. Маны үөрэх ситимиттэн ылан бырахпыттара куһаҕан дии саныыбын. ССРС саҕана курдук, оҕо саадыттан саҕалаан дойдуга бэриниилээх буолууга, Арассыыйа устуоруйатын билиигэ уһуйуу үлэтэ күүскэ барыахтаах дии саныыбын.

Дойду аармыйата бөҕө-таҕа буоллаҕына, күүстээх көмүскэллээх. Ол иһин урукку сэбиэскэй кэмнээҕи уопуту сөргүтэн, онно тирэҕирэн, билигин оҕо уһуйааннарыттан саҕалаан оскуолаларга барыларыгар ыччаттарбытын дойдуну таптааһын, киэн туттуу тыыныгар, бойобуой бэлэмнээх, ол өттүгэр сатабыллаах буолууларыгар иитиэх-үөрэтиэх тустаахпыт. Бу өттүгэр баар итэҕэһи-быһаҕаһы туоратыы түргэнник оҥоһулла охсубата өйдөнөр. НВП уруоктарын саҥаттан сөргүтэн, оҕолор байыаннай өттүнэн сатабыллаах, кыргыттар бастакы мэдиссиинискэй көмөнү оҥорор үөрүйэхтээх, үчүгэй бэлэмнээх оскуоланы бүтэрэллэрин ситиһиэххэ наада. Оҕолору байыаннай сатабылларга үөрэтиигэ Афганистан, Чечня сэриитин ааспыт, байыаннай дьыала диэн тугун билэр дьону бу үлэҕэ анаан үөрэттэрэн, үлэлэтиэххэ сөп.
Байыаннай эпэрээссийэ бара турар кэмигэр оҕолор биир дойдулаах буойуттарынан киэн тутталлар, кинилэри өйүүллэр. Дойду олохтоохторо байыаннай дьайыыларга кытта сылдьар дьоммутугар көмөлөһөллөр, кыайыы биһиэнэ буолуо диэн улахан эрэллээхтэр.