Спартак Слепцов иккис тыыннаммыт «Ийэ сүрэҕэ» испэктээгин долгуйа көрдүбүт

Ньурба тыйаатырыгар алтынньы 11 күнүгэр Саха АССР үтүөлээх артыыһа, «Норуоттар доҕордоһуулара» уордьан кавалера Спартак Иванович Слепцов төрөөбүтэ 90 сылыгар ананар тэрээһиннэр  чэрчилэринэн,   ийэ уолугар муҥура суох тапталын көрдөрөр «Ийэ сүрэҕэ»   номох-испэктээк оонньонно.

Бу — Саха Өрөспүүбүлүкэтин ускуустубатын үтүөлээх диэйэтэлэ Юрий Макаров Спартак Слепцов сырдык кэриэһигэр анаан, 2024 с. кулун тутар 22 күнүгэр иккис тыыннаан таһаарбыт испэктээгэ буолар.  Алексей Балакаев айымньытынан испэктээги Ньурба тыйаатырыгар Спартак Слепцов 1975 сыллаахха туруорбута.  Тыйаатыр ССРС национальнай драматургиятын үһүс бэстибээлигэр  бу испэктээгинэн кыттан, Саарка оруолун толорбут СӨ норуодунай артыыската Валентина Николаева ССРС Култуураҕа министиэристибэтин 1 истиэпэннээх дипломунан наҕараадаламмыта. Спартак Ивановичка анаммыт киэһэҕэ Валентина Николаева бэйэтэ толорбут Сааркатын таҥаһын кэтэн, саҥа испэктээккэ  Саарканы толорор СӨ үтүөлээх артыыһа Венера Никитиналыын сыанаҕа тахсан үҥкүүлээбитигэр, көрөөччүлэр өссө күүскэ таһыннылар,  долгуйдулар. Пүрбээ сүрүн  оруолун бу киэһэ Ефрем Татаринов бастакытын оонньоото. Элбэҕи эрэннэрэр эдэр биир идэлээхпитин  эҕэрдэлиибит!

Ньурба улууһун  култуураҕа уонна норуот айымньытыгар департаменын салайааччытын эбээһинэһин толорор Николаева Н.В. эҕэрдэ суругу тыйаатыр дириэктэрэ Розалия Тихоноваҕа туттарда. Сыанаҕа  Спартак Иванович төрөппүт кыргыттара Муза, Валерия Спартаковналар уонна Спартак Иванович улахан кыыһын кэргэнэ,  Арассыыйа, СӨ доруобуйатын харыстабылын туйгуна, үлэ бэтэрээнэ Иннокентий Христофорович тахсаннар,  Спартак Иванович төрөөбүтэ  90 сылыгар анаммыт тэрээһиннэр иһин махталларын биллэрдилэр, күндү аҕаларын туһунан аҕыннылар. СӨ норуодунай артыыстара Валентина Николаева, Борис Борисов тыйаатыр постановочнай чааһын сэбиэдиссэйэ Валерий Стручков оҥорбут өйдөбүнньүк статуэткаларын ыалдьыттарга туттардылар.

Юрий Макаров туруорбут испэктээгин туһунан санаатын көрөөччү, тыйаатыр сүгүрүйээччитэ, СӨ үөрэҕириитин туйгуна  Людмила Иннокентьева маннык үллэһиннэ:

“Режиссер С.И.Слепцов төрөөбүтэ  90 сылыгар анаан,  А.Балакаев  айымньытынан Юрий Макаров  туруорбут «Ийэ сүрэҕэ» испэктээгэр  сырыттым. Ийэҕэ ытыктабылы, ийэ таптала күүстээҕин, омугуттан тутулуга суох, норуот үйэлэргэ тыыннаах сыаннаһа буоларын иҥэрэр номоххо олоҕурбут дыраама. Спартак Слепцов көрөөччү иннигэр таһаарбыт маҥнайгы «Ийэ сүрэҕэ» испэктээгин көрбөтөҕүм — мин хомолтом… Арааһа, тэҥҥэ долгуйуом эбитэ  буолуо. К.Д.Уткин суруйбутунуу,  «Валентина Николаева талба  талаанын күлүм көстүүтүн арыйбыт» Сааркатын, Фаддей Попов Пүрбээтин, Ольга Григорьева Миндьээтин кытта. Ол да буоллар, кэлин Спартак   Иванович «Кыталык»  Култуура киинигэр  үлэлиир кэмигэр туруоруутун уонна  Юрий Макаров икки үлэтин көрдүм. Испэктээк  өссө тупсубут ду, тэтимэ, уота-күөһэ, дьүрүлэ, тыаһа-ууһа… Сүрүн оруоллар артыыстарын, ордук Пүрбээ оруолугар, алаас оҕолоро  буолбакка, киэҥ истиэп көҥүл оҕолорун иэйиилэрэ, хамсаныылара биллэ көстөр. Ийэ оруолун толорор Сардаана Михайлова айар кута өссө сайдан иһэрэ кэрэхсэтэр. Артыыстар: Венера Никитина — Алтан Богдо айдаар дойдутун баһылыга Саарка эгэлгэ дьүһүн   кубулуйуутун, Майя Слепцова дириҥ силистээх итэҕэл кэрэһитин, Леонид Анисимов Ытык көтөр-Хотой киэҥ-холку, хорутуулаах уобарастарын көрөөччүлэргэ,  буоларын курдук,  үрдүк таһымнаахтык тириэртилэр.  Саарка арыалдьыт дьоно көстө турар түгэн номох  буоларын санатан, толору ситэрэн-хоторон биэрэллэр. Калмык талааннаах  суруйааччыта  А.Балакаев «Ийэ сүрэҕэ» айымньытынан Юрий Макаров  туруорбут дыраамата күһүҥҥү дуоһуйуу, кэрэлиин  алтыһыы  киэһэтинэн буолла”.

Тыйаатыр пресс-сулууспата