“Спасская Падь” станцияҕа учуонайдар сэргэ туруордулар

Бэс ыйын 25-30 күннэригэр РНА СС Саха сиринээҕи билим-чинчийэр киинигэр «Растения в изменяющемся климате: адаптация, устойчивость и продукционный процесс» диэн Бүтүн Арассыыйатааҕы билим кэмпириэнсийэтэ буола турар.

Бу бөдөҥ тэрээһиҥҥэ Арассыыйа билимин академиятын 3 академига, араас эрэгийиэннэртэн 40-ча учуонай, Кытайтан, Беларусьтан кэлэн кыттыыны ыллылар. Кэмпириэнсийэҕэ килиимэт глобальнай уларыйыытынан үүнээйи молекулярнай физиологиятыгар туох уларыйыылар баралларын, онно хайдах сөп түбэһэн иһэрин чинчийбиттэрин кэпсэттилэр, ырытыстылар.

“Бэҕэһээ кэмпириэнсийэ кыттыылаахтара тэрээһин аһыллыытын кэнниттэн «Спасская Падь» диэн Криолитозона биологическай проблемаларга институтун чинчийэр станциятыгар тиийбиттэрэ, — диэн кэпсиир биологическай билим хандьытаата Роман Петров. — Манна биологическай билим дуоктара Трофим Христофорович Максимов көҕүлээһининэн Арассыыйа үүнээйигэ физиологтарын уопсастыбатын эмблематын кытта сахалыы оһуор-бичик уонна РНА академига Владимир Васильевич Кузнецов (РНА ИФР Москва) уонна РНА академига (Саха сиринээҕи билим-чинчийэр киин) Михаил Петрович Лебедев ааттара суруллубут сэргэтин туруордубут”.