СПИД-Кииҥҥэ ФЛГ кэбиниэтэ аһылынна

СПИД-ы уонна сыстыганнаах ыарыылары сэрэтиигэ уонна охсуһууга өрөспүүбүлүкэтээҕи кииҥҥэ сыыппаралаах флюорография кэбиниэтэ аһылынна.

Бу сыстыганнаах ыарыылары, ордук сэллиги,  утары охсуһууга дьоһуннаах хардыынан буолуоҕа.

Кэбиниэт ыарыыны чопчу быһаарар Проматрикс-РП аныгы ФЛГ аппараатынан сэбилэннэ.

«Флюорография кэбиниэтэ аһыллыыта биһиги Кииммитигэр улахан суолталаах түгэн. Биһиги эмтэнээччилэрбитигэр оҥоһуллар көмө табыгастаах уонна хаачыстыбалаах буоларыгар дьулуһабыт. Манна Саха сирин бары олохтоохторугар сэлликкэ былааннаммыт скрининг-чинчийиилэр  ыытыллыахтара. Онуоха санитария уонна эпидемиология нуормаларын тутуһуу ыарыһахтарга уонна мэдиссиинэ үлэһиттэригэр куттал суох буолларын хааччыйыаҕа», — диэн Киин кылаабынай бырааһа Александра Золотарева иһитиннэрдэ.

Санатан эттэххэ, флюорография тыынар уорганнар ыарыыларын быһаарар биир сүрүн ньыма уонна ыарыыны эрдэ буларга көмөлөһөр. Оччотугар эмтэнии үчүгэй түмүктэнэр уонна инфекция тарҕанарын сэрэтэр.