«Спид Стар» киинэни көрөөччүлэр сөбүлээтилэр

Кулун тутар 27 күнүттэн киэҥ экрааҥҥа «Спид Стар» диэн спортивнай байопик тахсыаҕа. Бүгүн «Лена» киинэ тыйаатырыгар прессаҕа көрдөрүү буолла.

— Дьэ, кэтэһиилээх күммүт үүннэ! Түөрт сыл кэтэстибит. Сүүстэн тахса киһи үлэлэстэ. Уонтан тахса оператор үлэлээбитэ. Үксэ Саха тыйаатырын артыыстара оонньоотулар, ол эрээри гостуруолга барбыт буолан, бүгүн кэлбэтилэр. Култуура министиэристибэтигэр, «Синет» хампаанньаҕа, «Гедеон-строй» тэрилтэҕэ көмөҕүт, өйөбүлгүт иһин махтанабыт! — диэн продюсер Степан Порядин кэпсээтэ.

Киинэни көрдөрүүгэ дьоруойдар прототиптара — тириэньэр Сергей Ядреев, ат сүүрдээччи, Ил Дархан сүүрдүүтүн 5 төгүллээх кыайыылааҕа Егор Оконешников, кэргэнэ Марина кэлэн, тэҥҥэ долгуйа көрдүлэр.

Киинэ режиссера — Алексей Амбросьев-Чоох Мунду:

— Сылтан сыл кэлэн үлэлэһэр, кытаанах усулуобуйаны тулуйан, үлэлээбит устар бөлөххө махтанабын. Бу икки сыллаах устуубут, түөрт сыллаах үлэлиир түмүгэ, — диэн санаатын үллэһиннэ.

Бу бэриниилээх буолуу, кыайыыга дьулуур, тулуур туһунан дьиҥнээх олоххо буолбуту кэпсиир киинэ. Ат сүүрдүүтүн устар уустуга биллэр. Ол үрдүнэн, устар бөлөх сыалын ситиспит, дьону долгутар киинэни устубут диэн этиэххэ сөп.

Көрөөччүлэр киинэни сөбүлээбиттэрин биллэрэн, тыҥааһыннаах түгэннэргэ ытыс таһынан, тэҥҥэ ыһыытаһа олордулар.