ВИДЕО. «Спид Стар» саҥа сахалыы киинэ трейлэрэ таҕыста

Саха сиригэр киэҥ экрааҥҥа «Спид Стар»  киинэ премьерата буоларыгар бэлэмнэнэллэр.

Хартыынаҕа Саха сиригэр аатырбыт «Спид Стар»  сүүрүк ат туһунан кэпсэнэр. Бу ат өрөспүүбүлүкэ баһылыгын бирииһигэр үс төгүллээх чөмпүйүөн. Хартыына дьиҥнээх олоххо буолбут түгэннэри сырдатар, онон ат сүүрдүүтүн сөбүлээччилэргэ уонна саха кинематографиятыгар чаҕылхай түгэнинэн буолуоҕа. Киинэ премьерата кулун тутар 27 күнүгэр ыытыллара былааннанар.

Киинэҕэ «Спид Стар» (Speed Star) аатырбыт сүүрүк ат устуоруйата уонна солбуллубат жокей Егор Оконешников туһунан кэпсэнэр. Режиссер уонна сценарист — Алексей Амбросьев. Генеральнай продюсер Степан Порядин. Сүрүн оруолларга оонньоотулар: Павел Ченянов, Иннокентий Луковцев, Павел Колесов, Алексей Егоров, Айталина Цыпандина, Степан Петров.