«Спид Стар» спортивнай драма ааспыт өрөбүллэргэ барыллаан киллэрбит үбэ-харчыта 9 мөлүйүөн солкуобайтан тахсыбыт

Киинэ бүддьүөтэ 10 мөлүйүөн солкуобайга тэҥнэһэр.

Киинэ пуондатын биир кэлим автоматизированнай информационнай систиэмэтэ (ЕАИС) бэлиэтээбитинэн, кулун тутар 27 күнүгэр прокатка тахсыбыт Саха сирин «Спид Стар» спортивнай драмата бастакы өрөбүллэргэ киллэрбит үбэ-харчыта быһа барыллаан 9,4 мөлүйүөн солкуобайтан тахса буолла.

Үгэс быһыытынан киирбит харчы улахан аҥаара кулун тутар 29-30 күннэригэр киирбитэ, онно киинэ 5 мөлүйүөнтэн тахса солкуобайы хомуйбута. Эрдэ атыылаһыллыбыт билиэти учуоттаан туран, киинэ прокатын уопсай дохуота 9,7 мөлүйүөнтэн тахса солкуобайга тэҥнэстэ.

СИА иһитиннэрбитинэн, бу бүтэһик дааннай буолбатах диэн бэлиэтиир тоҕоостоох, тоҕо диэтэххэ, күннээҕи прокат түмүгүн туһунан иһитиннэрии сарсыныгар, Москваҕа түүн турар кэмигэр, ыытыллыан сөп. Ол да буоллар «Спид Стар»  дойду үрдүнэн өрөбүллэргэ тахсар релиз түмүгүнэн 20 бастыҥ киинэ иһигэр киирэр кыахтанна, 13-с миэстэни ылан, “Роднина” киинэ иннигэр түстэ.