Спикер Екатерина Шаповалова асчыттары киинэ режиссердарын кытта үлэлииргэ ыҥырда

Саха сиригэр «Вкус Якутии» гастрономическай бэстибээл сайдыытын өйүүр, «Арассыыйа гастрономическай каартата» бырайыак салайааччыта Екатерина Шаповалова дойду асчыттарын кытта кинини туох ситимниирин кэпсээтэ, үлэтин уопутун билиһиннэрдэ.

Кини хас биирдии этиитин киһи истэ олорон, «кырдьык даҕаны…» диэн саҥа аллайыах курдук.
Холобура, бу этиини кытта хайдах сөбүлэһиэҥ суоҕай?
«Саха сиригэр киинэ индустрията олохтоохтук сайдан турар. Асчыттар, киинэ режиссердарын кытта биир ситимнээхтик үлэлээн, астаргытын, бүлүүдэлэрҥитин киинэҕэ киллэрэр гына кэпсэтиҥ. Бу угуйук эмиэ биир көрүҥэ дии!» диэн Москваттан сылдьар, Арассыыйа эрэгийиэннэрин ааттаах-суоллаах асчыттарын кытта бииргэ үлэлэһэр Екатерина Шаповалова бэлиэтээтэ. Креативнай индустрия бэстибээлин ыалдьытын бу санаатын үллэстиитин истэн баран, «кырдьык даҕаны!» дии санаатым. «Уот Дьулус аан» киинэҕэ Аҥар Харах ойоҕо Огдооччуйа «хайдах эрэ быырпах иһиэхпин баҕардым… » диэбитин өйдүү биэрдим. Сэрийээли көрбүт киһи Огдооччуйа хайдахтаах курдук минньигэһиргэтэн эппититтэн, киһи үксэ быырпах иһиэн баҕарбыта чуолкай. Сэрийээл биир сүрүн дьоруойун бу этиитэ саха быырпаҕын соҕотохто өрө таһаарбыта буолбаат!
Дьэ, онон, эрэстэрээннэр шеф-асчыттара, саха аһын тарҕатыыга үлэлэһэр дьон, Москва ыалдьытын бу сүбэтин болҕомтоҕо ылыҥ.