Спиридон Борбуев Москваҕа үлэлии сылдьар волонтердарга оһох бэлэхтээтэ (ВИДЕО)

Бары билэрбит курдук, Москва куоракка Саха сирин бастайааннай бэрэстэбиитэлэстибэтигэр «Сахаволонтердар» түмсүүлэрэ тэриллибитэ. Кинилэр байыаннай эпэрээссийэттэн кэлбит биир дойдулаахтарбытыгар араас хабааннаах көмөнү оҥороллор. 

Бастайааннай бэрэстэбиитэлэстибэҕэ харалла сыппыт дьоҕус билииккэни Антонина Попова волонтердарга уларсыбыт. Волонтердар иһитиннэрбиттэринэн, билииккэ кыамтата кыра буолан, аһы бытааннык буһарар эбит. Ол да буоллар, санааларын түһэрбэккэ, ас арааһын астыы сылдьыбыттар.

Саҥа дьыл буолара чугаһыырын эргин Үөһээ Бүлүүтээҕи үөрэх управлениетын начаалынньыга Спиридон Борбуев Балашихаҕа эмтэнэ сытар байыаска сылаас ас илдьибит. Кини волонтердар хосторугар киирэн баран, олус сөхпүт  уонна: «Сахаволонтердар хоскут кыараҕаһа бэрт эбит, оһоххут да борустуойа… Маннык гыныахха, госпиталтан төннүөхпэр диэри ханнык оһоххо наадыйаргытын биллэриҥ, быһаарыам» — диэн эппит.

Үтүө киһи биир тыллаах дииллэр.  Ороһуоспаны көрсө «Борбуев оһоҕо» оннун лоп-бааччы була охсубут. Волонтердар үөрүүлэрэ муҥура суох. Дьэ бу курдук, Саха сирин олохтоохторо бэйэлэрин баҕа санааларынан көмөлөһө, өйөбүл буола сылдьаллара махталлаах дьыала. «Ойуурдаах куобах охтубат…», — диэн маны этэн эрдэхтэрэ.

Салгыы видео-устууну көрүҥ.