Салгыы
Спорт сонуннарыттан

Спорт сонуннарыттан

Ааптар:
25.04.2023, 19:45
В.Посельскай хаартыскаҕа түһэриитэ
Бөлөххө киир:

17-18 саастаах уолаттарга Уһук Илин буоксаҕа чөмпүйэнээтигэр күөн көрсүһүү буолла. Барыта 13 ыйааһынтан сэттэтигэр Саха сирин буоксаҕа оскуолатын иитииллээччилэрэ бастаатылар.

48 кг Павел Васильев (Уус Алдан), 51 кг Андрей Егоров (Хаҥалас), 57 кг Руслан Никитин (Нерюнгри), 60 кг Леон Никифоров (Дьокуускай), 63,5 кг Владимир Митин (Дьокуускай), 86 кг Вячеслав Дронов (Мииринэй), 92 кг Эльдар Насирдинов (Нерюнгри) кыһыл көмүс мэтээллэри ылаттаатылар. Хамаанданы Р.М.Дмитриев аатынан ОЭУ тириэньэрдэрэ Василий Лисица, Андрей Слепцов уонна улуустар, оройуоннар тириэньэрдэрэ көмөлөөн бэлэмнээтилэр. Боксер уолаттар ыам ыйын 12-20 күннэригэр Тверьгэ буолар Арассыыйа чөмпүйэнээтин рингэтигэр кыттыахтара.

Мэҥэ Хаҥаласка гиирэ успуордугар оҕолорго биирдиилээн уонна хамаанданан бастыыр иһин улуус үөрэнээччилэрин I-кы Спартакиадалара буолла.

Бу туһунан гиирэ успуордугар ССРС спордун маастара, бэтэрээннэргэ Арассыыйа чөмпүйүөнэ, улуус “Урожайын” бэрэссэдээтэлэ, күрэхтэһии сүрүн судьуйата Виталий Пестряков иһитиннэрбитинэн, 11 оскуолаттан 66 уол уонна кыргыттар ким ордук бэлэмнээҕин быһаарыстылар. Кыргыттар 12 кг, уолаттар 14 уонна 16 кг гиирэлэринэн өрө анньыыга уонна өрө быраҕыыга күрэхтэстилэр.
15-н кыра саастаах оҕолорго 60 кг Майа лиссиэйиттэн Ярик Ксенофонтов, 60 кг үөһэ ыйааһыннаахтарга Чыамайыкы оскуолатыттан Артур Дьячковскай бастаатылар.
16-18 саастаах уолаттарга 65 кг Майа 2-с оскуолатыттан Айаал Яковлев, 65 кг үөһээ ыйааһыннаахтарга Хорообут оскуолатыттан Арсений Андреев, кыргыттарга Хара оскуолатыттан Эльза Павлова, абсолютнай чөмпүйүөн үрдүк аатын Хорообуттан Саина Брызгалова ылаттаатылар.
Хамаанданан түмүккэ И.Г.Тимофеев аатынан Майатааҕы лиссиэй бастаата, Дмитрий Таас аатынан Хорообут оскуолата — иккис, Ф.Г.Охлопков аатынан Майа оскуолата үһүс бириистээх миэстэлэргэ тигистилэр.

В.Посельскай хаартыскаҕа түһэриитэ

ГТО III БЭСТИБЭЭЛЭ

Муус устар 22-23 күннэригэр ГТО нормативтарыгар өрөспүүбүлүкэ III бэстибээлэ үрдүк тэрээһиннээхтик ыытылынна.

Тэрээһин Саха сиригэр физкультурнай хамсааһын 100 сылыгар уонна уонна өрөспүүбүлүкэҕэ биллэриллибит Үлэ сылыгар ананна. Н.Н.Тарскай аатынан “Туймаада” стадион чэпчэки атлетикаҕа манеһыгар улуустар, оройуоннар, үлэ кэлэктииптэрин, судаарыстыбаннай сулууспалар 15 хамаандата, барыта 75 киһи муһунна. Саастарынан хас да бөлөххө арахсан сүүрүүгэ, тардыныыга, муостаттан анньыныыга, буулдьанан ытыыга, имигэстик хамсаныыга уонна харбааһыҥҥа күрэхтэстилэр. Сүрүн сыал-сорук ыам ыйыгар Удмуртияҕа Ижевскэй куоракка буолар Бүтүн Арассыыйатааҕы күрэхтэһиигэ хамаанданы сүүмэрдээһин. Хамаандалар кичэллээхтик оҥостон, бэлэмнэнэн кэлбиттэрэ күрэхтэһиини сытыырхатта.

Саастарынан ГТО нормативтарын IX кэрдииһигэр (25-29 сс.) университеттан Светлана Тимофеева, Мэҥэ Хаҥаластан Темир Сыдыкбеков; X-XI (30-34, 35-39 сс.) университеттан Евгения Сентизова, өрөспүүбүлүкэ спорка кииниттэн Василий Гаврильев; XII-XIII (40-44, 45-49 сс.) университеттан Арина Югова, Сунтаартан Андрей Оконешниокв; XIV-XV (50-54, 55-59 сс.) Наталья Стуканева, экология министиэристибэтиттэн Евгений Егоров абсолютнай чөмпүйүөннэр үрдүк ааттарын ылаттаатылар.

Биирдиилээн көрүҥнэр кыайыылаахтара быһаарылыннылар. Тумба үрдүгэр туран умса төҥкөйөн илиилэринэн уунан саамай ыраахха тиэрдиигэ үп министиэристибэтиттэн Саргылаана Степанова 31 см, Намтан Гаврил Гоголев 28 см диэри тиэрдэннэр, «Саамай имигэстэрин» көрдөрдүлэр; 2 км сүүрүүгэ университеттан Арина Югова 9 мүн 11 сөк, Василий Находкин 3 км 7 мүн 48 сөк. кэлэннэр, “Саамай түргэн”; Арина Югова 35-тэ муостаттан анньынан, Алдантан Расиль Халиуллин 24 тардынан “Саамай күүстээх”; салгын саатынан ытыыга өҥөнү оҥорор судаарыстыбаннай киинтэн Ольга Семкина, Намтан Гаврил Гоголев “Саамай бэргэн”; сытан эрэ куорпуһун 52-тэ өрө көтөҕөн университеттан Арина Югова, Сунтаартан Андрей Оконешников “Саамай тулуурдаах”; Алдантан Наталья Стуканева уонна Расиль Халиуллин “Бастыҥ харбыыһыт” ааттары ылаттаатылар.
Алдан оройуонун баһылыгын 1-кы солбуйааччы Расиль Халиуллин үс киһилээх хамаандатыттан үһүөн мэтээллэргэ тигистилэр. Өрөспүүбүлүкэ экономикаҕа миниистирэ Майя Данилова салайааччылаах хамаанда бастакы миэстэни ылла. Өрөспүүбүлүкэ сүүмэрдэммит хамаандата ыам ыйын 12-17 күннэригэр Удмуртия Ижевскэй куоратыгар тиийэн Бүтүн Россиятааҕы ГТО бэстибээлигэр Саха сирин чиэһин көмүскүөхтэрэ. Ситиһии тосхойдун!

Баһылай Посельскай,

Дьокуускай.

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
13 июля
  • 30°C
  • Ощущается: 29°Влажность: 37% Скорость ветра: 4 м/с

Сообщить об опечатке

Текст, который будет отправлен нашим редакторам: