«Спортинг-компакт» көрүҥэр чөмпүйэнээт

Бу күннэргэ Дьокуускайга стендовай ытыы  «Спортинг-компакт» көрүҥэр чөмпүйэнээт аһыллыыта буолан ааста.

Чөмпүйэнээккэ уопсайа 67 спортсмен 12 хамаанда кытта сылдьар диэн СӨ физическэй култуураҕа уонна маассабай успуорка управлениета иһитиннэрэр.

Саха сирин чөмпүйэнээтин үөрүүлээх аһыллыытыгар спортсменнары уонна ыалдьыттары СӨ Физическэй култуураҕа уонна маассабай успуорка  управлениетын салайааччыта Роман Оконешников эҕэрдэлээтэ. Кини өрөспүүбүлүкэҕэ ытыы спордун сайыннарыыга тэрээһин улахан суолталааҕын бэлиэтээтэ уонна кыттааччыларга үрдүк көрдөрүүлэри баҕарда.

Тэрээһин ытык ыалдьыттарынан СӨ Спортинг федерациятын вице-бэрэсидьиэнэ, Спортиҥҥа аан дойду, Европа уонна Азия хас да төгүллээх чөмпүйүөнэ Айаал Макаров, «Бейбарис» комфортнай территория генеральнай дириэктэрэ, Акмолинскай уобалас стендовай ытыыга федерациятын бэрэсидьиэнэ, Акмолинскай уобалас  VIII ыҥырыылаах маслихатын дьокутаата Руслан Шамкенов (Казахстан), Чөмпүйэнээт кылаабынай судьуйата, 1 категориялаах судьуйа Артур Николаев буоллулар.

СӨ Физическэй култуураҕа уонна успуорка министиэристибэтин аатыттан Роман Оконешников Казахстантан кэлбит ыалдьыкка Махтал суругу уонна өйдөбүнньүк бэлэҕи туттарда.

Саха сиригэр үһүс төгүлүн кэлэ сылдьар Руслан Жаксылыкович Шамкенов эмиэ махтал тылларын эттэ уонна «Бэргэн» успуорт кулуубугар бэлэхтэри туттарда, ону тэҥэ бары спортсменнары уонна тэрийээччилэри Алматыга (Казахстан) норуоттар икки ардыларынааҕы күрэхтэһиигэ ыҥырда.