Спортивнай оскуолалар уонна тэрилтэлэр оптуобустаннылар

Бүгүн, алтынньы 28 күнүгэр, Дьокуускайга «Триумф» успуорт уораҕайыгар өрөспүүбүлүкэ физкултуураҕа уонна успуорка тэрилтэлэригэр көлөлөрү үөрүүлээх быһыыга-майгыга туттардылар. Бу микрооптуобустар уонна «УАЗ Патриот» массыыналар.

Өрөспүүбүлүкэ успуорка тэрилтэлэригэр биэс ПАЗ оптуобус, «Газель Некст» 7 микрооптуобус, икки УАЗ микрооптуобус, икки «УАЗ Патриот» массыына күлүүстэрэ туттарылыннылар.

Ил Дархан Айсен Николаев уонна СӨ Бырабыыталыстыбатын аатыттан премьер-миниистир Кирилл Бычков эҕэрдэлээтэ.

«Саҥа оптуобустар спортивнай оскуолаларга уонна өрөспүүбүлүкэ сүүмэрдэммит хамаандаларыгар эдэр спортсменнары өйүүр соруктаах бэриллэллэр. Кинилэр талааннарынан уонна ситиһиилэринэн аан дойдуну сөхтөрүөхтэрэ, Саха сирин спортивнай устуоруйатын саҥа дьоруойдарынан буолуохтара диэн эрэнэбин. Саҥаттан саҥа кыайыылары баҕарабын! «, — диэтэ кини.

Кини быйыл «Азия оҕолоро» Норуоттар икки ардыларынааҕы спортивнай оонньуулар өрө көтөҕүллүүлээхтик буолан ааспыттарын, бу 2024 сылга аан дойдуга ыччаттар успуортарыгар биир саамай улахан уонна бэлиэ тэрээһининэн буолбутун санатта. Бу далааһыннаах тэрээһининэн өрөспүүбүлүкэҕэ успуорт эбийиэктэрэ саҥардыллыбыттара, тупсарыллан оҥоһуллубуттара, саҥа уонна наадалаах тэриллэр ылыллыбыттара. Кирилл Бычков Саха сирин спортсменнара аан дойду таһымыгар улахан, дьоһун ситиһиилэри, түмүктэри өссө төгүл көрдөрүөхтэрэ диэн эрэнэрин биллэрдэ.

Успуорт миниистирэ Леонид Спиридонов Ил Дархан Айсен Николаевка уонна СӨ Бырабыыталыстыбатыгар оҕо успуордун өйүүллэригэр махтанна.

«Бу ордук тыа сирдэригэр успуорт оскуолаларын сайыннарыыга, атын сиргэ буолар күрэхтэһиилэргэ тиийэн көхтөөхтүк кытталларыгар, эдэр спортсменнары бэлэмнээһин таһымын үрдэтиигэ уонна сайдалларыгар усулуобуйаны тэрийиигэ улахан суолталаах. Эрэгийиэммит спортивнай эйгэтэ салгыы сайдарыгар эрэнэбит«, — диэтэ Н.С.Тимофеев аатынан олимпийскай эрэллэри бэлэмниир успуорт оскуолатын дириэктэрэ Василий Винокуров.

Саҥа тиэхиньикэлэр «Бороҕон» олимпийскай эрэллэри бэлэмниир успуорт оскуолатыгар, Н.С.Тимофеев аатынан олимпийскай эрэллэри бэлэмниир успуорт оскуолатыгар, А.И.Пахомов аатынан буоксаҕа олимпийскай эрэллэри бэлэмниир успуорт оскуолатыгар, футбол спортивнай оскуолатыгар, спортивнай эрэллэри бэлэмниир өрөспүүбүлүкэтээҕи кииҥҥэ, СӨ сүүмэрдэммит хамаандатын бэлэмниир спортивнай кииҥҥэ, Баһылай Манчаары аатынан успуорт национальнай көрүҥнэрин киинигэр, адаптивнай физкултуура уонна успуорт киинигэр, физкултуура уонна маассабай успуорт управлениетыгар, кыһыҥҥы көрүҥнэргэ бэлэмниир успуорт оскуолатыгар, А.И.Иванов аатынан олимпийскай эрэллэри бэлэмниир успуорт оскуолатыгар, «Чолбон» успуорт оскуолатыгар, единоборствоҕа олимпийскай эрэллэри бэлэмниир успуорт оскуолатыгар бэрилиннилэр.

СӨ Ил Дарханын уонна Бырабыыталыстыбатын пресс-сулууспата

Мария Васильева хаартыскаларга түһэриитэ, СИА