«Спортивные якутяне»: Чэпчэки атлетикаҕа Дьокуускай хамаандата бастаата

Горнай улууһун Бэрдьигэстээх нэһилиэгэр «Чыпчаал» стадиоҥҥа   «Азия оҕолоро» VIII норуоттар икки ардыларынааҕы успуорт оонньууларын көрсө икки хонук устата «Спортивные Якутяне» өрөспүүбүлүкэ үөрэнээччилэрин спартакиадатын чэпчэки атлетикаҕа күрэхтэһии буолан ааста.

Күрэхтэһиигэ барыта 33 хамаанданан 404 спортсмен күөн көрүстэ. Оҕолор кыайыы туһугар бары кыахтарын көрдөрдүлэр. Кытаанах илин-кэлин түсүһүү буолла. Бииргэ үөрэнэр, дьарыктанар оҕолоругар бэрдьигэстээхтэр ис сүрэхтэриттэн ыалдьан, ыһыытаан-хаһыытаан биэрдилэр. Кыайыыларын-хотууларын тэҥҥэ үллэстэн түмсүүлээхтэрин көрдөрдүлэр.

Чэпчэки атлетикаҕа биир сүрүн болҕомтону тардар көрүҥ эстафета буолар. Кыргыттарга үс бастыҥ иһигэр Дьокуускай, Мииринэй, Алдан хамаандалара кииристилэр. Уолаттарга кылаан миэстэ үктэлигэр бастакы — Мэҥэ Хаҥалас, иккис — Дьокуускай, үһүс — Чурапчы таҕыстылар.
Уопсай түмүк көрдөрүүлэринэн  кыайыылаах үрдүк аатын Дьокуускай хамаандата сүктэ, оттон ккис миэстэ — Мэҥэ Хаҥалас уонна үһүс  — Чурапчы хамаандалара буоллулар.

Бүгүн, бэс ыйын 10 күнүгэр, киэһэ 17:00 чаастан тэрээһин үөрүүлээх сабыллыытын сиэрэ-туома, ону тэҥэ, көрүҥнэринэн кыайыылаахтары наҕараадалааһын киин куорат Доҕордоһуу болуоссатыгар ыытыллыаҕа.

Санаттахха, Ил Дархан Айсен Сергеевич Николаев быһаарыытынан, быйылгы сылтан, үөрэнээччилэр спартакиадаларыгар чөмпүйүөннэри бэлэмнээбит тириэньэрдэргэ биир кэмнээх төлөбүр көрүллэр. Спартакиада үөрүүлээх сабыллыытыгар 31 бастыҥ тириэньэр Ил Дархан 100 тыһ.солк. суумалаах төлөбүрүн тутуоҕа.

Финалга оҕолор успуорт 9 көрүҥэр күрэхтэһэллэр: бокс, волейбол, көҥүл тустуу, гиирэ успуорда, чэпчэки атлетика, мас тардыһыыта, оҕунан ытыы, саахымат, дуобат.

Вячеслав Алексеев